ئەنجومەنی وەزیرانی عێراق رەزامەندی دەربڕی لەسەر بەردەوامی خەرجکردنی بودجەی ھەڵبژاردنی پەرلەمانی کوردستان و زمانی کوردیشی وەک زمانی رەسمی لە رەشنوسی یاسای دادنووسیدا جێگیر کرد.
ئەمڕۆ سێشەممە ١٢ی ئازاری ٢٠٢٤، ئەنجومەنی وەزیرانی عێراق کۆبووەوە و رەزامەندی دەربڕی لەسەر بەردەوامی خەرجکردنی بودجەی ھەڵبژاردنی پەرلەمانی کوردستان لەلایەن کۆمیسیۆنی باڵای سەربەخۆی ھەڵبژاردنەکانەوە.
مانگی ١٢ی ساڵی رابردوو ئەنجوومەنی وەزیران بڕیاریدا، ٦٩ ملیار و ٢٣٠ ملیۆن دینار بۆ بەڕێوەچوونی پرۆسەی ھەڵبژاردنی پەرلەمانی ھەرێمی کوردستان خەرج بکرێت.
هەروەها رەشنوسی ھەمواری یەکەمی یاسای دادنووسی ژمارە ٣٣ی ساڵی ١٩٩٨ی پەسەندکرد و لە ماددەی ١٦ی رەشنوسەکەدا ئاماژە بەوەکراوە، ھەردوو زمانی عەرەبی و کوردی دوو زمانی رەسمین بۆ پێشکەشکردنی نوسراو و بەڵگەنامەکان لە فەرمانگەکاندا.
