قائیمقامیەتی سلێمانی بڵاویکردەوە، بەهۆی وەرگرتنی پارەی زیاتر لە کڕیارو پابەند نەبوون بە رێنماییەکان و ئەو نرخەی بۆیان دیاریکراوە، لیژنە هاوبەشەکان دوو دوکانی غازفرۆشی لە نزیک فولکەی مامەڕیشە داخست و رێکارە یاساییەکان لەگەڵ خاوەنەکانیان دەگرنەبەر.
گۆران قادر- سەرۆکی لیژنە هاوبەشەکانی قائیمقامیەتی سلێمانی رایگەیاند: ئەو دوو غازفرۆشە بتڵی غازیان بە سەروو نرخی دیارکراو فرۆشتووە کە پێچەوانەی رێنماییەکانە، هەربۆیە داخران و رێکاری یاساییان لەگەڵ دەگرینەبەر.
وتیشی: نرخی بتڵێک غازی پڕ (٢٨) کیلۆگرامی، (٨) هەزارو (٥٠٠) دینارەو رێگەنادەین هیچ کەس و دووکاندارێک بەو نرخە زیاتر بیفرۆشێت.
سەرۆکی لیژنە هاوبەشەکان باسی لەوەش کرد کە ئەو غازەی لە بەنزینخانەکاندا دەفرۆشرێ غازی بازرگانییەو لەلایەن حکومەتەوە پاڵپشتی نەکراوەو بەدەرە لەو نرخە پاڵپشتیکراوە.
