وەزیری کشتوکاڵی عێراق دڵنیایی بە هاووڵاتییان دەدات کە 19 هەزار ئاژەڵەی لە بەڕازیلەوە هاوردەکراون، پشکنینیان بۆ کراوە و سەلامەتن.
ئەمڕۆ چوارشەممە، عەباس جەبر مالیکی، وەزیری کشتوکاڵ، دڵنیایی دا کە ئەو کەشتییە کوەیتییەی کە نۆزدە هەزار سەر ئاژەڵی هەڵگرتبوو کە دەگاتە دەست، دوور بوو لە هەر جۆرە نەخۆشی و پەتایەک.
وەزارەتی کشتوکاڵ لە ڕاگەیەندراوێکدا ڕایگەیاند، هاووڵاتییان دڵنیا دەکەینەوە ئەو مانگایانەی لە بەڕزایلەوە هاوردەکراون، سەرجەمیان سەلامەتن و تەندروستن.
پشتڕاستیشی کردەوە، تیمی پزیشکی ڤێتێرنەری سەرجەم ڕێکارەکانی پشکنینی مەیدانییان تەواو کرد و سەلمێندرا کە سەرجەم ئاژەڵەکان دوور بوون لە هەر جۆرە نەخۆشیی و پەتایەک، لەگەڵ تەواوکردنی سەرجەم ڕێکارەکانی چوونە ژوورەوەیان بۆ بەندەرەکانی عێراق، دواتر ڕەوانەکردنیان بۆ ناو بازاڕەکانی عێراق.
وەزارەتی کشتوکاڵی عێراق باسی لەوەشکرد، حکومەت سەرجەم ڕێکارەکان دەگرنەبەر بۆ پاراستنی ئاسایش و سەلامەتی خۆراک، دابینکردنی هەموو بەروبوومی ڕووەکی و ئاژەڵ لە بازاڕەکانی عێراق بە نرخێکی قبوڵکراو، بەشێوەیەک کە ڕێگری لە گرانبوون و کەمبوونەوەی هەر جۆرە خۆراکێک یان کاڵایەکی کشتوکاڵی بکات، بە لەبەرچاوگرتنی پاراستنی بەرژەوەندی بەرهەمهێنەرانی ناوخۆیی.
