مامۆستایانی ناڕازی “هەژماری من” ڕەتدەکەنەوە، ئەمڕۆ خۆپیشاندانێکی ناڕەزایەتییان ئەنجامدا و داوایان کرد مووچەکانیان لەلایەن بانکە فیدڕاڵییەکانی عێراقەوە دابەشبکرێت.
ئه‌مڕۆ شەممە، به‌شێك له مامۆستایان و فه‌رمانبه‌رانی ناڕازی له شاره‌كانی سلێمانی و هه‌ڵه‌بجه گردبوونه‌وه و خۆپیشاندانێکی ناڕەزایەتییان ئەنجامدا، داوای جێبه‌جێكردنی بڕیاره‌كانی دادگای فیدڕاڵی په‌یوه‌ست به دابه‌شكردنی مووچه به شێوه‌ی ڕاسته‌وخۆ له‌لایه‌ن وه‌زاره‌تی دارایی عێراق ده‌كه‌ن.
مامۆستایان لە شاری سلێمانی لەبەردەم پەروەردەی ڕۆژئاوا گردبوونەوە و دواتر بە ڕێپێوان بەرەو دادگای سلێمانی ڕۆشتن، لە میانەی خۆپیشاندانەکەدا مامۆستایان بۆ پەیامنێری خەڵک جەختیان کردەوە لەوەی، کە متمانەیان بە حکومەتی هەرێم و پڕۆژەی “هەژماری من” نییە.
هاوکات مامۆستایان ئاماژەیان بەوەشکرد، ئێمە دەمانەوێت مووچەکانمان لە ململانێی سیاسی جیابکرێتەوە، پشتگیری بڕیارەکەی دادگای فیدڕاڵی دەکەین، دەمانەوێت وەک مووچەخۆرێکی عێراقی مامەڵەمان لەگەڵ بکرێت.
وتیشیان، متمانەمان نییە و نامانەوێت مووچەکانمان لەلایەن بانکە حزبییەکانی هەرێمەوە دابەشبکرێت، چونکە هەر کاتێک دەسەڵاتییان هەبووبێت سیاسەتی برسیکردنیان پەیڕەوکردووە، هەر بۆیە دەمانەوێت مووچەکانمان ڕاستەوخۆ لەلایەن بانکە حکومەییەکانی عێراقەوە دابەشبکرێت.
ئەمەش لە کاتێکدایە، ڕۆژی 21-2-2024 دادگای فیدڕاڵی عێراق بڕیاری دا بە پابەند كردنی حكومەتی عێراقی بۆ پێدانی مووچەی فەرمانبەرانی هەرێمی كوردستان لە ڕێگەی هەژماری بانکی بانکە فیدڕاڵییەکانی عێراقەوە.
