سەرۆکی ئەرمینیا گەیشتە هەرێمی کوردستان و لەگەڵ سەرۆکی هەرێمی کوردستان کۆدەبێتەوە.
ڤاهگن خاچاتوریان، سەرۆکی ئەرمینیا دوای سەردانی بەغدا و کۆبوونەوەی لەگەڵ بەرپرسانی عێراق، ئەمڕۆ پێنجشەممە، لە ڕێگەی فڕۆکەخانەی نێودەوڵەتیی هەولێرەوە گەیشتە هەرێمی کوردستان.
نێچیرڤان بارزانی، سەرۆکی هەرێمی کوردستان و سەرۆکی ئەرمینیا کۆدەبنەوە و باسی پەیوەندییەکانی هەردوولا، بەهێزکردنی پەیوەندیی ئابووری و وەبەرهێنان دەکەن.
ئەمەش لە کاتێکدایە ڕۆژی سێشەممە، ڤاهاگن خاچاتوریان، سەرۆکی ئەرمینیا بە سەردانێکی فەرمی گەیشتە بەغدا و لەگەڵ محەممەد شیاع سوودانى، سەرۆک وەزیرانی عێراق کۆبووەوە.
لە کۆبوونەوەکەدا سوودانی جەختی لە بایەخی ئەم سەردانە کردووەتەوە و باسی دەرفەتەکانی وەبەرهێنانی کردووە و ئاماژەی بەوە کردووە، کۆمپانیاکانی ئەرمینیا دەتوانن لە عێراق کاری وەبەرهێنان بکەن.
