سەرۆکی حکومەتی هەرێمی کوردستان بۆ بەدواداچوون بۆ رووداوی ئاگرکەوتنەوەکەی بازاڕی لەنگەی هەولێر پەیوەندی بە پارێزگاری هەولێرەوە دەکات و رایسپارد کە بەدواداچوون و لێکۆڵینەوەی ورد بۆ هۆکارەکانی ڕوودانی ئاگرەکە بکەن.
ئەمشەو سێشەممە 2/27 مەسرور بارزانی سەرۆکی حکومەتی هەرێمی کوردستان، بۆ بەدواداچوونی ڕووداوی ئاگرکەوتنەوەی بازاڕی لەنگەی هەولێر، لە پەیوەندییەکی تەلەفۆنیدا، ئومێد خۆشناو پارێزگاری هەولێر و دەزگا پەیوەندیدارەکانی ڕاسپارد کە بەدواداچوون و لێکۆڵینەوەی ورد بۆ هۆکارەکانی ڕوودانی ئاگرەکە بکەن.
لە پەیوەندییە تەلەفونییەکەدا سەرۆکی حکومەت دەستخۆشی لە تیمەکانی ئاگرکوژێنەوە و پۆلیس و ئاسایش و هاتووچۆ و تەندروستی و شارەوانی کرد بۆ زوو گەیشتن بە شوێنی ڕووداوەکە و هەوڵەکانیان لە پێناو کۆنترۆڵکردنە ئاگرەکە و بەهاناوەچوونی زیانلێکەوتووان.
مەسرور بارزانی ئامادەیی حکومەتیشی دەربڕی بۆ هاوکاریکردنی زیانلێکەوتووان و دەزگاکانی حکومەتیشی ڕاسپارد کە هەرجی پێویست بێت لەمبارەیەوە ئەنجامی بدەن.
ئەمشەو ئاگر لە بازاڕی لەنگەی هەولێر کەوتەوە و بەهۆیەوە زیاتر لە ٣٠٠ دوکان سوتان و ٢٠ کەسیش تووشی تەنگەنەفەسی بوون.
