مامۆستایەکی زانکۆ شیکاری بۆ جۆرێتی ئەو ئاوی بارانە کردووە کە لەم شەپۆلەی چەند ڕۆژی ڕابردوودا باریوە، دەرکەوتووە بەشی زۆری بۆ خواردنەوە شیاوە.
م ئوسامە ئەشرەف ، مامۆستای زانکۆ, بڵاویکردۆتەوە، لەم شەپۆلەی باران باریندا كە ماوەی پێنج ڕۆژی خایاند، بەپێی ئەو بارانپێوەی دامناوە، لە شاری هەڵەبجەدا بڕی (122 ملم) باران باریووە، تایبەتمەندی ئاوی بارانەكەش بەم جۆرە بووە:
یەكەم: (pH)ی ئاوی بارانەكە بریتی بووە لە (5.36)، كە pH)ی ئاوی خاوێن (7)، (pH)ی ئاو بەكاردێت بۆ دیاریكردنی ترشی و تفتی ئاو.
دووەم: ماددە ڕەقە تواوەكان (TDS)ی ئاوی بارانەكە (6 PPM) بووە، واتە لە ملیۆنێك بەش تەنها (6) بەشی بریتی بووە لە ماددەی ڕەقی تواوەی ناو ئاو.
دیارە ئەمانەش بەپێی بارودۆخی كەش و وەرزی دبارینەكە و پیسی هەوای شوێنەكە گۆڕانكاری بەسەردادێت.
بەگشتی (pH)ی ئاوی باران (5 – 5.5) و ئاوی دەریاچە (6-8) و ئاوی ڕووبار (7.4) و ئاوی ژێرزەوی (8.5) و ئاوی زەریا (8.1)، هەر یەك لەمانەش قابیلی گۆڕانە بەپێی كات و شوێن.
شایەنی باسە، لە ماوەی چەند ڕۆژی ڕابردوودا، شەپۆلێکی بەهێزی باران و تەرزە و بروسکە هەرێمی کوردستانی گرتەوە، و لە چەند پارێزگایەکی هەرێم ئاو و لافاو چوونە نێو ماڵی هاووڵاتیان و زیانی ماددی لێکەوتەوە.
