خوێندکارانی پۆلی 12 لە قەڵادزێ خۆپیشاندانیان کرد و داواکارییەکانیان گەیاندە بەڕێوەبەرایەتی پەروەردەی پشدەر.
ئەمڕۆ دووشەممە، خوێندکارانی پۆلی 12 لە شارۆچکەی قەڵادزێ خۆپیشاندانێکیان بۆ بەردەم بەڕێوەبەرایەتی پەروەردەی پشدەر ئەنجام دا.
خوێندکاران داوای کەمکردنەوەی پرۆگرام و درێژکردنەوەی ماوەی خوێندن دەکەن بۆ ئەوەی بۆ تاقیکردنەوەی وزاری ئامادە بن.
بە هۆی دواکەوتنی مووچە، ڕاگرتنی پلەبەرزکردنەوە و دانەمەزراندنی وانەبێژانەوە، مامۆستایانی سنووری پارێزگاکانی سلێمانی، هەڵەبجە و هەردوو ئیدارەی گەرمیان و ڕاپەڕین لە دەستپێکی ساڵی خوێندنی 2023-2024ەوە بایکۆتیان ڕاگەیاندووە، ئەوەش وایکرد کە خوێندن لە سنووری ئەو شار و شارۆچکانەی بە ناوچەی بایکۆت ناودەبرێن، دوابکەوێت.
