ماوەی چەند ڕۆژێک دەبێت شەپۆلێکی بارانبارین ناوچەکانی هەرێمی کوردستانی گرتووەتەوە، شارەزایەکی کەشناسیش پێشبینییەکانی کەشوهەوای بۆ ڕۆژانی ئایندە ڕاگەیاند، سبەینێ تاوەباران و بروسکە چالاک دەبێت.
ئەمڕۆ یەکشەممە، ئاراس جەبار شارەزای کەشناسی ڕایگەیاند، سبەینێ دووشەممە، لە ئەنجامی بەردەوامی کاریگەری لاوازی نزمەپاڵەپەستۆی دەریای ناوەراست ئاسمانی ھەرێم بە زۆری نیمچە ھەور دەبێت و لە کاتەکانی بەیانیدا تەم و مژ دەبێت، لە نێوان کاتەکانی پاش نیوەرۆ بۆ ئێوارە بەھۆی زیادبوونی وزەی گەرمی تیشکی خۆر شێ و تەری ڕووی خاک بە ھەڵم دەبێت و لە شوێنی دیاری نەکراودا لە ناوچەکانی پارێزگای سلێمانی، ھەڵەبجە، ھەولێر، دھۆک و ئیدارەی ڕاپەرین کەش لەبار دەبێت بۆ دروستبوونی کەڵەکە ھەوری بە بروسکە و تاوە بارانی کورت خایان چالاک دەبێتەوە بە ڕێژەی جیاواز و کاتەکانی ئێوارە کۆتای پێدێت، پلەکانی گەرما بەراورد بە ئەمڕۆ بە ڕێژەی 2 پلە بەرزدەبێتەوە، خێرای با لەسەرخۆ دەبێت لەنێوان ٥ بۆ١٠ کیلۆمەتر لە کاتژمێرێکدا ئاڕاستەی با ناجێگیر دەبێت .
ئاماژەی بەوەکرد، بۆ دوو سبەی سێشەممە بە ھەمان شێوە تاوەباران و بروسکە لە شوێنی جیاجیادا بەردەوامی دەبێت بارانی ئەمڕۆ و دوو ڕۆژی داھاتووش زیاتر پێکدێت لە بەھەڵمبوونی شێ و تەریی ناوخۆیی و دووبارە چربوونەوەیەتی بەسەر شوێنی جیاجیادا کە لە ئەنجامی ئەو بارانە زۆرەیە کە لە ڕۆژانی ڕابردوو باری، ئەمەش سودی دەبێت بۆ باشتربوونی شەپۆلەکانی داھاتووی بارانبارین.
