پارێزگای هەولێر ڕایگەیاند، سەرجەم حاڵەتەکانی بەرزبوونەوەی ئاویان لە ناوچە جیاکانی هەولێر کۆنترۆڵ کرد.
پارێزگای هەولێر ڕایگەیاند، دوای نیوەڕۆی ئەمڕۆ هەینی شەپۆلێکی بارانبارین دەستی پێکردەوە، سەرەتا بە شێوەی نمە باران و بارانی مامناوەند بوو، دواتر لە هەندێک کاتدا بە شێوەی تاوە باران و تەرزە و هەورە تریشقە بوو.
ڕوونیشیکردەوە کە بە هۆی شەپۆلەکەوە لە بەشێک لە شەقامەکانی ناو شاری هەولێر ڕێژەیەکی زۆر ئاو بەرز بوویەوە و بووە هۆی دروستبوونی ئاستەنگی هاتووچۆ و لە چەند گەڕەکێکیش ژمارەیەک ماڵ مەترسیان کەوتەسەر.
پارێزگای هەولێر ڕاشیگەیاند، لەلایەن سەرجەم تیمەکانی (شارەوانی، بەرگری شارستانی، پۆلیس، ئاسایش، زێرەڤانی، هاتووچۆ، تەندروستی، ئاو و ئاوەڕۆکا، وەڵامدانەوەی خێرای مرۆیی، قەیرانەکانی پارێزگا، دەزگای خێرخوازی بارزانی) توانرا لەزووترین کاتدا سەرجەم حاڵەتەکان کۆنتڕۆڵ بکرێت.
لە دوێنێوە شەپۆلێک بارانبارین هەرێمی کوردستانی گرتووەتەوە و بە هۆیەوە زیانی ماددی لە چەند ناوچەیەکی جیا کەوتەوە.
