ئەندامێکی ئەنجومەنی نوێنەران داوای زیادکردنی ژمارەی پارێزگاکانی عێراق دەکات و دەڵێت جگە لە هەڵەبجە، پێویستە ژمارەیەک قەزای پێنج پارێزگای دیکەش بکرێنە پارێزگا.
جەواد یەساری، جێگری سەرۆکی لیژنەی هەرێم و پارێزگاکان لە لێدوانێکیدا بۆ ڕۆژنامەی سەباح ڕایگەیاند، لیژنەکەمان گفتوگۆ لە سەر کۆمەڵێک یاسا دەکات، لە پێش هەمووشیانەوە یاسای پارێزگای هەڵەبجە کە خوێندنەوەی یەکەم و دووەمی بۆ کراوە، بەڵام یاساکە بە هۆی دیاریکردنی سنووری کارگێڕی لەنێوان پارێزگاکاندا ڕاگیراوە.
یەساری هیوای خواست چەند پارێزگایەکی نوێ دروست بکرێت لە پێناو کەمکردنەوەی قەرەباڵغی پارێزگا گەورەکان و ئەوەشی خستەوو کە ژمارەیەک قەزای سەڵاحەدین، نەینەوا، ئەنبار، واست و ناسڕیە لەبارن بۆ ئەوەی بکرێنە پارێزگا.
داواشی کرد ژمارەیەک ناحیە بکرێنە قەزا و هەر گوندێکیش ژمارەی دانیشتووانەکەی لە 30 هەزار کەس زیاتر بێت بکرێتە ناحیە و وتیشی: “چەندین ناحیە هەیە ژمارەی دانیشتووانەکەی گەیستووەتە 200 هەزار کەس، بەلام هێشتا هەر وەکو خۆی ماوەتەوە”.
