ڕاوێژکاری ئاسایشی نیشتمانی عێراق لە کۆبوونەوەیەدا لەگەڵ سەرۆکی دەسەڵاتی دادوەری ئێران ڕایگەیاند، عێراق پابەندبووە بە جێبەجێکردنی ڕێککەوتنی ئەمنی لەگەڵ ئێران و دەشڵێت: ” ڕێگەنادەین خاکی عێراق ببێتە مەترسی بۆ هێرشكردنە سەر وڵاتانی دراوسێ”.
نوسینگەی ڕاگەیاندنی ڕاوێژکاری ئاسایشی نیشتمانی عێراق لە بەیاننامەیەكدا ئاماژەی بەوەكردووە، ئەمڕۆ چوار شەممە، قاسم ئەعرەجی ڕاوێژکاری ئاسایشی نیشتمانی و غولام موحسین، سەرۆکی دەسەڵاتی دادوەری ئێران کۆبوونەوە و گفتوگۆیان لەبارەی هەماهەنگییە ئەمنییەکانی تاران و بەغدا کرد.
ئەعرەجی ڕایگەیاندووە، ئاسایشی عێراق و ئێران هاوبەشە و حکومەتی عێراقیش سوورە لەسەر جێبەجێکردنی ڕێكکەوتنی ئەمنی نێوان هەردوو وڵات، پێویستە ئێرانیش لەبەرامبەردا پابەند بێت بە بڕگەکانی ئەو ڕێککەوتنە.
وتوشیەتی، “گرنگە کار بۆ پاراستنی ئاسایش و سەقامگیری ناوچەکە بکرێت لە رێگەی هەماهەنگی و هاوکاریکردنی یەکتر لە چارەسەری کێشەکان”.
جەختیشی كردۆتەوە، حکومەتی عێراقی ڕێگە نادات خاکەکەی ببێتە ناوچەی دوژمنایەتی و ڕێگەنادەین خاکی عێراق ببێتە مەترسی بۆ هێرشكردنە سەر وڵاتانی دراوسێ.
