لە لوتکەی جیهانیی حکومەتەکان لە دوبەی، مەسرور بارزانی سەرۆکی حکومەتی هەرێم لەگەڵ جێگری سەرۆکی ئیمارات کۆبووەوە و هەوڵەکانیان بۆ بەهێزترکردنی پەیوەندییەکانیان دووپاتکردەوە.
مەسرور بارزانی ڕایگەیاند لەگەڵ خارەنشکۆ شێخ محەمەد بن ڕاشد ئال مەکتووم جێگری سەرۆکی دەوڵەتی ئیمارات و سەرۆکی ئەنجومەنی وەزیران و حاکمی میرنشینی دوبەی كۆبووینەوە.
ئاماژەی بەوەشداوە، لە کۆبوونەوەکەدا شێخ حەمدان بن محەمەد بن ڕاشد جێنشینی دوبەی و مەکتووم بن محەمەد بن ڕاشد جێگری یەکەمی حاکمی دوبەی و ژمارەیەکی دیکەی لە بەرپرسانی باڵای ئیمارات ئامادەی بوون، گفتوگۆ لەبارەی پەرەپێدانی پەیوەندییەکانی هەرێمی کوردستان و ئیمارات کرا.
مەسرور بارزانی سوپاسی پشتیوانیی بەردەوامی دەوڵەتی ئیماراتیان لە حکومەتی هەرێمی کوردستان کرد .
لای خۆیەوە شێخ محەمەد بن راشد ، خۆشحاڵی خۆی بە بەشداری شاندی هەرێمی کوردستان لە لوتکەی جیهانیی حکومەتەکان لە دوبەی نیشاندا و ئامادەیی وڵاتەکەی بۆ برەودان بە پەیوەندی دوولایەنە لە بوارە جۆراوجۆرەکاندا دەربڕی.
