وەزارەتی سامانە ئاوییەکان پڕکردنەوە و وشککردنەوەی ٢٣٤ دەریاچەی ماسی لە ناو کەرتی پڕۆژەی موسەییب لە پارێزگای بابل ڕاگەیاند.
ئەمڕۆ چوارشەممە، حسێن عەبدوڵڵا بێرمانی، بەرێوەبەر لە بەرێوەبەرایەتی سامانە ئاوییەکان لە پرۆژەی موسەیب، لە ڕاگەیەندراوێکدا بڵاویکردەوە، ” لەلایەن ستافی بەڕێوەبەرایەتییەکەمان لە پرۆژەی موسەیب، وشککردن و پڕکردنەوەی ٢٣٤ دەریاچەی ماسی بە سەرکەوتووی ئەنجامدراوە”.
بیرمانی ڕوونیکردەوە، “ئەم هەڵمەتە لە چوارچێوەی ڕێوشوێنەکانی وەزارەتدایە کە ئامانج لێی چارەسەرکردنی کەم ئاویی و بەکارهێنانی ئاوە بە شێوەیەکی تەندروست کە دابەشکردنی ئاو بە شێوازێکی دادپەروەرانە مسۆگەر بکات”.
لە مانگی ئابی ساڵی ڕابردوودا وەزارەتی سامانە ئاوییەکان پڕکردنەوەی زیاتر لە دوو هەزار و ٩٦٥ دەریاچەی ماسی ڕاگەیاند کە بە نایاسایی لە سەرجەم ناوچە و شارەکانی وڵات دروست بوون، هاوکات چەندین دەریاچەی دەستکردی ناو حەوزی ڕووباری دیجلە لابراون کە ژمارەیان بە هەزار و ٢١٢ حەوز بوون و نا یاسایی بوون.
قەیرانی کەمی ئاو لە عێراق لە ماوەی ساڵانی ڕابردوودا بە چەند هۆکارێک خراپتر بووە، لەوانە خراپ بەڕێوەبردنی ئاو، گۆڕانی کەشوهەوا، کەمبوونەوەی بڕی ئاوی هاتوو لە ڕووباری دیجلە و فورات لەلایەن تورکیا و ئێران.
لە هەمان کاتدا ئەم وڵاتانە عێراق بە هۆکاری خراپ بەڕێوەبردنی ئاو لەڕووی هەڵگرتنی نادروست یان شێوازی کشتوکاڵی کۆن دەزانن.
دوایین خەمڵاندنەکان ئاماژە بەوە دەکەن کە ڕووبەری زۆنگاوەکان ئەمڕۆ نزیکەی ٤ هەزار کیلۆمەتر چوارگۆشەیە، لە کاتێکدا لە ماوەی ساڵانی نەوەدەکاندا ٢٠ هەزار کیلۆمەتر چوارگۆشە بووە، تا ئێستاش تەنیا چەند هەزار کەسێکی تێدا نیشتەجێیە.
لەماوەی چەند ساڵی ڕابردوودا بەهۆی کەمی بارانبارین و کەمبوونەوەی ئاوی ڕووبارەکانی دیجلە و فورات عێراق دووچاوی کەمی ئاوی توند بووە.
