مامۆستایانی ناڕازی هاوکات لەگەڵ دەستپێکردنەوەی خۆپیشاندان، جەخت لە بەردەوامبوونی بایکۆت دەکەنەوە.
بڕیارە ئەمڕۆ مامۆستایانی ناڕازی هاوشێوەی یەکشەممەکانی ڕابردوو خۆپیشاندان لە پارێزگاکانی سلێمانی، هەڵەبجە و هەردوو ئیدارەی گەرمیان و ڕاپەڕین دەستپێبکەنەوە کە بە ناوچەکانی بایکۆت ناودەبرێن.
داواکارییە سەرەکییەکانی مامۆستایان، دابەشکردنی مووچە لە کاتی خۆی، دەستپێکردنەوەی پلەبەرزکردنەوە و دامەزراندنی وانەبێژانن، بەڵام تا ئێستا حکومەتی هەرێم هیچکام لەو داواکارییانەی جێبەجێ نەکردووە و دەستیشیکردووە بە سزادانی ئەو مامۆستایانەی پابەندی دەوام نابن.
لە کاردانەوەی سزاکانیش، دوێنێ شەممە، مامۆستایانی ناڕازی چەند دروشمێکیان بە دیوارەکانی هەرسێ پەروەردەکەی سلێمانی ( رۆژهەڵات- ڕۆژئاوا- گشتی)دا هەڵواسی و داوای هەڵوەشاندنەوەی سزاکانیان کرد.
مامۆستایانی ناڕازی ڕاگەیەنراوێکیشیان بڵاوکردەوە و بانگەوازیان بۆ خۆپیشاندانەکەی ئەمڕۆ کرد کە لە ژێر دروشمی “یەکشەممەی دووپاتکردنەوەی بایکۆت و ناڕەزایەتیەکان” ئەنجام دەدرێت.
