هاتوچۆی هەولێر ئاگاداری شوفێران دەكاتەوە، ئێستە كامێرای خاڵ بۆ خاڵ لەڕێی شەقڵاوە- قەندیل دانراوە و بەشێوەی كاتی كار دەكات.
ئەمڕۆ شەممە، هاتوچۆی هەولێر ئاگادارییەکی بڵاوکردەوە و شوفێران ئاگادار دەکاتەوە کە لە ئەمڕۆوە كامێراكانی تۆماركردنی سەرپێچی خێرایی خاڵ بۆ خاڵ، لە ڕێی شەقڵاوە- قەندیل دەكەوێتە كار بەشێوەی تاقیكردنەوە.
ئاماژەی بەوەکردووە، لە کاتژمێر ١٢ شەو لە بەرواری ١٠ شوبات ئەو كامێرایانە بە هەمیشەیی كار دەكەن و سەرپێچییەكانی تیژڕۆیی تۆماردەکەن لە سیستمی سزادانی هاتوچۆ.
باسی لەوەشکردووە، بەرزترین خێرایی ڕێپێدراو بۆ ئۆتۆمبێلە بچووكەكان، ١٠٠ كیلۆمەترە لە کاتژمێرێکدا و بۆ ئۆتۆمبێلی بارهەڵگری گەورەش ٨٠ كیلۆمەتر لە کاتژمێرێکدا دیاری كراوە.
بەهۆی دانانی كامێرای هاتوچۆ، ئێستا ڕێژەی ڕووداوەكان ٪٦٥ كەمیكردووە و كەمترین ڕووداوی هاتوچۆ لەو ڕێگایانە تۆمار دەكرێن كە كامێرایان تێدایە.
