بانكی ناوەندی عێراق بۆ كۆنتڕۆڵ كردنی بەهای دۆلار چەندین ڕێکاری گرتووەتەبەر، بەڵام بەهای ئەو دراوە ئەمریكییە بەرامبەر بە دیناری عێراقی بەرزبووەتەوە و دۆلارفرۆشێکیش دەڵێت، “هۆكارەكەی دەگەڕێتەوە بۆ هێرشە سەربازییەکانی ئەمریكا و سزاخستنە سەر بانكەكان”.
دۆلارفرۆشێک لە بازاڕی دۆلارەکەی شاری سلێمانی بۆ تۆڕی میدیایی خەڵک ڕایگەیاند، ئەمڕۆ نرخی ١٠٠ دۆلاری ئەمریکی بەرامبەرە بە ١٥٢ هەزار و ٢٥٠ دیناری عێراقیی، بەراورد بە هەفتەی ڕابردوو نرخەکەی بەرزبووەتەوە، بەڵام لە ماوەی پێشتردا بەهای دۆلار تا ١٥٣ هەزار دینار ڕۆشت.
ئەو دۆلارفرۆشە سەبارەت بە هۆکاری ناجێگیری بەهای دۆلار ئاماژەی بەوەکرد، ئەمریکا سزای خستووەتە سەر هەشت بانکی عێراقی (جنوب ئیسلامی، حامورابی، العربیة الاسلامیة، ئیتیحاد، ئیستیسمار و ئەنساری) کارکردنیان لە دەرەوە وەستاوە بە تۆمەتی پارە سپیکردنەوەی بۆ ئێران، ئێستا بە کۆی گشتی ٢٢ بانکی عێراقی بلۆک کراون.
بەپێی زانیارییەکانی ئەو کاسبکارەی بازاڕی دۆلارەکەی شاری سلێمانی، لە نێو ئەو بانکانەدا کە ئەمریکا سزای خستوونەتەسەر، دوو بانکی هەرێمی کوردستانیش بوونیان هەیە، بەڵام (خەڵک)، تا وەرگرتنی ڕای بەرپرسانیان پەیوەست بەم بابەتە ناوەکانی لای خۆی پاراستووە.
وتیشی، بەهۆی ئەوەی لە پێشتردا بینیومانە ئەمریکا کاتێک سزادەخاتە سەر بانکێک لای نابات، ئەمەش کاریگەری لەسەر بەرزبوونەوەی بەهای دۆلار هەیە.
ئەوەشی خستەڕوو، نا سەقامگیری سیاسی بە پلەی یەکەم کاریگەری هەیە لەسەر جموجۆڵی بازاڕ، بەهای دۆلار شەوی ڕابردوو بە ١٥١ هەزار و ٧٥٠ دینار بوو، بەڵام پاش هەواڵی هێرشەکانی ئەمریکا بۆسەر بنکەی گروپە چەکدارەکان، ٥٠٠ دینار چووە سەر نرخەکەی.
ئەو دۆلارفرۆشە باسی لەوەکرد، ئەم دۆخەی ئێستا هەیە بۆ دیناری عێراقی هاوشێوەی تمەنی ئێرانییە، کاتیک ئەمریکا بەردەوام سزاکانی لەسەر زیاد کرد و وردە وردە بەهاکەی دابەزی، بۆیە دەتوانین بڵێین ترس لەسەر داهاتووی دیناری عێراقی هەیە.
ئەمەش لە کاتێکدایە بانکی ناوەندی چەندین ڕێکاری بۆ جێگیرکردنی بەهای دۆلار بەرامبەر دینار ڕاگەیاند، بەڵام تا ئێستا بە فەرمی جێبەجێنەکراوە.
