ڕاوێژکاری کاروباری دارایی و ئابووری سەرۆك وەزیرانی عێراق هۆکاری بەرزبوونەوەی نرخی دۆلار بۆ ئەو گرژییە ئەمنییانە دەگێڕێتەوە کە چەند ڕۆژێکە بە هۆی کوژران و برینداربوونی دەیان سەربازی ئەمریکی، لە ناوچەکەدا دروست بووە.
موزهیر محەمەد، راوێژکاری دارایی و ئابووری محەمەد شیاع سودانی سەرۆك وەزیرانی عێراق، لە لێدوانێکیدا بۆ ڕۆژنامەی سەباح ڕایگەیاند، بەرزبوونەوەی نرخی دۆلار بۆ پشێوییە ئەمنییەکانی ناوچەکە دەگەڕێتەوە کە لە کڕین و فرۆشتنی دۆلاردا کاریگەری لەسەر بڕیاری جامبازەکان دروست دەکات.
لای خۆشیەوە ئەحمەد سەفار، بڕیاردەری پێشووی لیژنەی دارایی ئەنجومەنی نوێنەران ڕایگەیاند، نرخی دۆلار لەسەر بنەمای ڕوداوە سیاسییەکان هەڵبەز و دابەز دەکات و جێگیر نابێت.
ڕاشیگەیاند، پێدەچێت ئەو گۆڕانکارییە کەمەی لە چەند ڕۆژی ڕابردوودا ڕوویدا بە هۆی لێدانی بنکە سەربازییەکەی ئەمریکاوە بووبێت لە ئوردن.
ئەحمەد سەفار وتیشی: “تاوەکو عێراق نەبێتە وڵاتێکی بەرهەمهێن نرخی دۆلار جێگیر نابێت، چونکە عێراق بۆ دابینکردنی زۆربەی پێویستییەکانی پشت بە هاوردەکردن دەبەستێت و لە زۆربەی ئەو مامەڵانەشدا دۆلار بەکاردەهێنرێت”.
جەختیشیکردەوە بە بێ چالاککردنی کەرتی ئابووری و بوژاندنەوەی بەرهەمهێنان، بانکی ناوەندی و حکومەتی عیراق ناتوانن نرخی دۆلار جێگیر بکەن.
