فەرمانگەی میدیا و زانیاری حكوومەتی هەرێمی كوردستان لە راگەیەندراوێكدا كە لە ماڵپەڕی حكوومەتی هەرێمی كوردستان بڵاوكراوەتەوە، ئاماژەی بەوەكردووە كە تا ١٩ی كانوونی یەكەم، وەزارەتی سامانە سرووشتییەكان، ٣٦ ملیۆن و ٨٦٩ ھەزار ٤٠٠ لیتر نەوتی سپی لە سەرانسەری ھەرێمی كوردستان دابەشكردووە.
فەرمانگەی میدیا و زانیاری لە راگەیەنراوەكەیدا ئاماژەی بەوەداوە كە بەپێی دوایین ئاماری وەبەرھێنانی كانزایی وەزارەتی سامانە سرووشتییەكان، تاوەكو ١٩ی كانوونی یەكەمی ئەمساڵ، ١٨٤ ھەزار و ٣٤٧ خێزان لە پرۆسەی دابەشكردنی نەوتی سپی سوودمەندبوون و پرۆسەكەش لە ناوچە شاخاوییەكان بەردەوام دەبێت.
راشیگەیاندووە لە سنووری پارێزگای ھەولێر، نۆ ملیۆن و ٩٢٤ ھەزار لیتر نەوتی سپی دابەشكراوە و تیایدا ٤٩ ھەزار و ٦٢٠ خێزان سوودمەندبوون، هاوكات لە سنووری پارێزگای دھۆك، ١٠ ملیۆن و ٦٤١ ھەزار و ٦٠٠ لیتر نەوتی سپی دابەشكراوە و تیایدا ٥٣ ھەزار و ٢٠٨ خێزان، سوودمەندبوون، هەورەها لە سنووری پارێزگای سلێمانی و ھەڵەبجەش، ١٦ ملیۆن و ٣٠٣ ھەزار و ٨٠٠ لیتر نەوتی سپی دابەشكراوە و تیایدا ٨١ ھەزار و ٥١٩ خێزان سوودمەندبوون.
ئەوەیشی خستووەتەڕوو كە حكوومەت بڕی ٧٠ ملیار دیناری بۆ كڕینی نەوتی سپی تەرخانكردووە و بەشێوەی تەندەر ٣٢٠ ھەزار بەرمیلی بە نرخی ٢٨٤ ھەزار دینار بۆ ھەر بەرمیلێك دابینكردووە، ھەروەھا پاڵپشتیی حكوومەت بۆ نرخی ھەر بەرمیلێك دەگاتە سەدا ٦٥ و هاووڵاتییان تەنیا سەدا ٣٥ی نرخەكەی دەدەن.
