دوو چەکدار ھێرشیان کردە سەر کڵێسای سانتا ماریا لە گەڕەکی سارییەری شاری ئیستانبوڵی تورکیا.
میدیای تورکیا بلاویکردەوە، تا ئێستا هۆکاری هێرشەکە نەزانراوە و کەسێکیش لە ئاکامی تەقەی ئەنجامدەرانی ھێرشەکە کوژراوە.
ئەوەش خراوەتەڕوو کە ژمارەیەکی زۆر لە پۆلیس و ھێزەکانی فریاکەوتن ڕەوانەی شوێنەکە کراون و ھەوڵەکان بۆ دەستگیرکردنی ئەنجامدەرانی ھێرشەکە بەردەوامن.
عەلی یەرلیکایا، وەزیری ناوخۆی تورکیا وێڕای ئیدانەکردنی ھێرشەکە لە تۆڕی کۆمەڵایەتی ڕایگەیاند دوو کەس کە دەم و چاویان داپۆشرابوون، ھێرشێکی چەکدارییان کردووەتە سەر کڵێسایەک کە لەو کاتەی ڕێوڕەسمی ئایینی تیایدا بەڕێوەدەچوو.
وتیشی: “بە داخەوە لە ئاکامی ھێرشەکەدا، کەسێک گیانی لەدەستداوە. لێکۆڵینەوە لەبارەی ڕووداوەکە دەستی پێکردووە و ھەوڵەکانیش بۆ دەستگیرکردنی ئەنجامدەرانی ھێرشەکە بەردەوامن”.
