دووه‌مین كۆنفڕانسی نیشتیمانی گۆڕان دەستیپێکرد و ئەندامێکی جڤاتی نیشتمانیی بزوتنەوەی گۆڕان ڕایگەیاند، “ئەرکی کۆنفڕانس هەڵسەنگاندنی کاری ئەنجومەنە هەڵبژێدراوەکانە.”
ئەمڕۆ شەممە، کاردۆ محەمەد، ئەندامی جڤاتی نیشتمانیی بزوتنەوەی گۆڕان لە کۆنفڕانسێکی ڕۆژنامەوانیدا کە پەیامنێری خەڵک ئامادەبوو ڕایگەیاند، ” لەژێر دروشمی بەرەو قۆناغێکی نوێ بۆ بەرەنگاربوونەوەی ئاڵەنگارییەکان دووەمین کۆنفرانسی خۆی دەبەستێت، ئەرکی کۆنفڕانس هەڵسەنگاندنی کاری ئەنجومەنە هەڵبژێدراوەکانە و ئامانجی خۆڕێکخستنەوەی بزوتنەوەکەیە”.
ئاماژەی بەوەشکرد، “گۆڕان یەکێک لە هەنگاوەکانی کۆتاییهێنانە بە پارچە پارچەبوون و ناکۆکی لەنێو ماڵی کورددا، پێویستە هەمووان دژایەتی گەندەڵی بکەین و سەرجەم لایەنە سیاسییەکان لەنێوخۆدا یەکگرتووبین، هاوکات لە خوارەوە بۆ سەرەوە هەڵبژاردن دەکرێت و مەکۆکان دروستدەکرێن و جڤاتی نیشتمانیی بزووتنەوەکە هەڵدەبژێردرێت”.
ئەمڕۆ دووەمین کۆنفڕانسی بزوتنەوەی گۆڕان لە گردی زەرگەتەی شاری سلێمانی بە بەشداریی زیاتر لە ٨٠٠ کەس دەستیپێکرد و بۆ ماوەی دوو ڕۆژ بەردەوام دەبێت.
