عێراق لە دژی هێرشە مووشەکییەکانی کۆماری ئیسلامی ئێران بۆ سەر شاری هەولێر سکاڵای لە نەتەوە یەکگرتووەکان و ئەنجومەنی ئاسایشی نیودەوڵەتی تۆمار کرد و جەختیش دەکاتەوە لەوەی قوربانییانی هێرشەکە کەسانی مەدەنین.
وەزارەتی دەرەوەی عێراق ڕایگەیاند، لە دژی هێرشە دوژمنکارییەکەی ئێران بۆ سەر هەولێر سکاڵای لە ئەنجومەنی ئاسایشی نیودەوڵەتی تۆمار کرد و جەختیشیکردەوە، ئەوانەی لە هێرشەکەدا بوونەتە قوربانی مەدەنین و زیانی ماددیشی بە موڵکی تاك و گشت لێکەوتووەتەوە.
وەزارەتی دەرەوەی عێراق ئەوەشیخستەڕوو کە سکاڵاکەی لە چوارچێوەی دوو نامەی چوونیەك بۆ ئەمینداری گشتی نەتەوە یەکگرتووەکان و سەرۆکی ئەنجومەنی ئاسایشی نێودەوڵەتیدا تۆمار کردووە.
ڕاشیگەیاند لە نامەکاندا ئەوە دووپاتکراوەتەوە کە هێرشە دوژمنکارییەکە پێشێلکارییەکی ڕوونی سەروەری عێراق و سەلامەتی هەرێمایەتی و ئاسایشی گەلی عێراقە.
شەوی دووشەممە، سوپای پاسداران بە 11 مووشەکی بالیستی هێرشی کردە سەر چەند شوێنێکی مەدەنی و بە هۆیەوە ژمارەیەك هاووڵاتی شەهید و برینداربوون.
دەستدرێژییەکەی ئێران لەسەر ئاستی ناوخۆ و نێودەوڵەتی کاردانەوەی لێکەوەتەوە و هێرشەکەیان ئیدانە کرد.
