وەزارەتی كار و كاروباری كۆمەڵایەتی حكومەتی هەرێم ڕایدەگەیەنێت، لەسەر ڕەزامەندی سەرۆكی حكومەت، ئەو مێردمنداڵانەی “نەوجەوان” تەمەنیان دەبێتە 18 ساڵ بە شێوەی گرێبەست دادەمەزرێن.
كوێستان محەمەد، وەزیری كار و كاروباری كۆمەڵایەتی لە نووسراوێكدا، كە وێنەی دەست (خەڵك) كەوتووە و ئاڕاستەی نووسینگەی سەرۆكی حكومەتی هەرێمی كردووە سەبارەت بە ڕەزامەندی پێشووی سەرۆكی حكومەت لەسەر پێشنیارەكانی وەزارەتەكە بۆ چارەسەری خانەكانی كوڕان و كچان، داوای دامەزراندنی ئەو كوڕ و كچانەی كردووە بە گرێبەست، كە تەمەنی 18 ساڵییان تەواو كردووە.
هاوكات، ئومێد سەباح، سەرۆكی دیوانی ئەنجوومەنی وەزیران لە نووسراوێكدا وەڵامی وەزیری كار و كاروباری كۆمەڵایەتی داوەتەوە بۆ دامەزراندنی ئەو نەوجەوانانە و داوای بەراییەكانی لە (پێناس و بڕوانامە) كردووە، تاوەكو كاری پێویست ئەنجام بدرێت بۆ دامەزراندنیان.
وەزارەتی كار و كاروباری كۆمەلایەتی لە ڕاگەیەنراوێكدا ئاماژەی بەوەكردووە، سەرۆکی حکومەتی هەرێمی کوردستان رەزامەندی دەربڕی لەسەر داوایەکی کوێستان محەمەد، وەزیری کار و کاروباری کۆمەڵایەتی، تایبەت بەو منداڵانەی تەمەنیان دەبێتە ١٨ ساڵ لە خانەکانی کوران و کچانی بێ سەرپەرشت بۆ دامەزراندنیان بە شێوەی گرێبەست.
ڕاشیگەیاندووە، یەکەمین جارە لە دوای کابینە یەک لەدوای یەکەکانی حکومەتی هەرێمی کورستان، كە کابینەی ٩ کۆتایی بە کێشەی ئەو مێردمنداڵانە هێنا.
