هێزەكانی سووریای دیموكرات (هەسەدە) ئاشكرایكرد، لە ناوچەی ئەلكەسرای دێرەزۆر لە ئەنجامی ئۆپەراسیۆنێكی هێزەكانیان و هاوپەیماناندا سەركردەیەكی داعش دەستگیركراوە.
سووریای دیموكرات لە ڕاگەیەندراوێكدا ئاماژەی بەوەكرد كە ئۆپەراسیۆنەكانی هاوبەشی هێزەكانیان و هاوپەیمانی نێودەوڵەتی دژی داعش بەردەوامە و لە ماوەی دوو حەفتەی ڕابردوودا پێنج ئۆپراسیۆنیان ئەنجامداوە.
دەشڵێت ” رۆژی هەینی ١٥ی كانونی یەكەم بە پشتگیری هێزەكانی هاوپەیمانان لە ناوچەی ئەلكەسرای رۆژئاوای دێرەزۆر ئۆپراسیۆنێك ئەنجامدراوە و لە ئەنجامدا ئەمیرێكی رێكخراوی تیرۆریستی داعش دەستگیركراوە كە بەرپرسی رێكخستن و چالاكییە تیرۆریستییەكانی داعش لە هەرێمەكە بووە.”
هەروەها باسی ئەوەی كرد كە لە ئۆپەراسیۆنەكەدا دەست بەسەر ژمارەیەك ئامێری پەیوەندی و بەڵگەدا گیراوە.
