یەکێتی وەبەرهێنەران ڕایدەگەیەنێت کە هێرشە درۆنی و مووشەکییەکانی سەر شارەکانی هەرێمی کوردستان نائارامی سیاسی و ئابوورییان لە ناوچەکەدا هێناوەتە ئارا و داوا لە حکومەتی هەرێم و عێراقی فیدراڵ دەکات هەموو ڕێكارێكی پێویست بگرنەبەر بۆ دووبارەنەبوونەوەی ئەم پەلامارانە.
یەکێتی وەبەرهێنەرانی کوردستان، ڕاگەیەندراوێکی دەربارەی هێرشە مووشەکییەکەی سەر شاری هەولێر بلاوکردەوە و پرسەو سەرەخۆشی ئاڕاستەی کەسوکاری پێشڕەو دزەیی کرد و تێیدا هاتووە، لە هێرشەکەدا “هاوکارمان (پێشرەو دزەیی) وەبەرهێنەری دیار و بەناوبانگی یەکێتی وەبەرهێنەرانی کوردستان و چەند ئەندامێکی خانەوادەکەی گیانیان لەدەستداو سەختی و کاریگەریی بۆردوومانەکانیش هۆکار بوون بۆگیان لەدەستدان و برینداربوونی ژمارەیەک هاووڵاتی سڤیل”.
یەکێتی وەبەرهێنەران ئەوەش دەخاتەڕوو کە بەردەوامی هێرشە درۆنی و مووشەکییەکانی سەر شارەکانی هەرێمی کوردستان نائارامی سیاسی و ئابوورییان لە ناوچەکەدا هێناوەتە ئارا و دۆخێکی دژواریان لە سەرجەم شارەکانی هەرێمدا دروستکردووە.
دەقی راگەیەنراوەکەی یەکێتی وەبەرهێنەران:
بەناوی خودای گەورە و میهرەبان
ڕاگەیەنراوێک لەیەکێتی وەبەرهێنەرانی کوردستانەوە
شەوی ڕابردوو هەولێری پایتەختی کوردستان کرایە ئامانج و بەهۆیەوە هاوکارمان (پێشرەو دزەیی) وەبەرهێنەری دیار و بەناوبانگی یەکێتی وەبەرهێنەرانی کوردستان و چەند ئەندامێکی خانەوادەکەی گیانیان لەدەستداو سەختی و کاریگەریی بۆردوومانەکانیش هۆکار بوون بۆگیان لەدەستدان و برینداربوونی ژمارەیەک هاووڵاتی سڤیل، بەم بۆنە خەمناکەوە پرسەو سەرەخۆشی خۆمان ئاڕاستەی ئەو هاورێ ئازیزەمان و خانەوادەکەی و سەرجەم قوربانیانی ئەو بۆردوومانە دەکەین و ئەم هەوڵە سەرکۆنەو شەرمەزار دەکەین، هاوکات هەر هێرش و پەلاماردانێكیش رەتدەکەینەوە كە سەروەری خاکی هەرێم و عێراق پێشێل دەکات.
ئاشکرایە، کە بەردەوامی هێرشە درۆنی و مووشەکییەکان، کە ماوەیەکە شارەکانی هەرێمی کوردستانی کردووەتە ئامانج، نائارامی سیاسی و ئابوورییان لە ناوچەکەدا هێناوەتە ئارا و دۆخێکی دژواریان لە سەرجەم شارەکانی هەرێمدا دروستکردووە، کە روون و ئاشکرا کاریگەرییەکانی لەسەر هەموو بوارەکانی ژیان دیارە.
ئومێدەوارین هەردوو حکومەتی هەرێم و عێراقی فیدراڵ، هەموو ڕێكارێكی پێویست بگرنەبەر بۆ دووبارەنەبوونەوەی ئەم پەلامارانەو كاری جددی بكەن بۆ چارەسەركردنی ریشەیی و رێگریكردن لە تێكچوونی ئاسایشی هەرێمی كوردستان.
ئێمە لە یەکێتی وەبەرهێنەرانی کوردستان پێمان وایە، ئەوەی لە نێوان وڵاتانی زلهێزدا دەگوزەرێت نابێت لەسەر حسابی وڵاتانی ناوچەکە بێت و شکستی جەنگ و ماڵوێرانییەکانی خۆیان بە ئێمەدا هەڵواسن، چونکە دۆخەکە بەم جۆرە چارەسەر نابێ و تەنھا ئاڵۆزی نالەباری تیا دێتە ئارا، کە سەرەنجام گەلانی عێراق باجەکەی دەدەن.
بەدەرفەتیشی دەزانین لە وەها دۆخیکدا، داوا لە هەمووان بکەین یەک دەنگ و یەک هەڵویست و یەک ریز بین، چونکە جیاوازی لە کوردبوونمان ناکرێت و کەی ویسترا، بەوانەشەوە کە بە دۆست و پشتیوانیان دەزانین رق و کینەی خۆیان بەسەر خاک و وڵات و هاونیشتمانیانماندا دەرێژن.
خودای گەورە و کاربەجێ پارێزەری هەموو لایەک بێت و وڵاتمان لە ئاشووب و ناهەموواری بەدوور بکات.
یەکێتی وەبەرهێنەرانی کوردستان
16-1-2024
