سەرۆکی تۆڕی ڕاگەیاندنی ئەمنی عێراقی ئەو هەواڵانە ڕەتدەکاتەوە، کە باس لە هاتنی هێزی بیانیی زیاتر بۆ عێراق دەکات و ڕایدەگەیەنێت، بوونی هاوپەیمانیی نێودەوڵەتیش تەنها بۆ ڕاوێژ و ڕاهێنان و زانیاریی ئەمنییە.
تەحسین خەفاجی، سەرۆکی شانەی ڕاگەیاندنی ئەمنی عێراق ڕایگەیاندووە، هەواڵی هاتنەناوەوەی هێزی سەربازیی دیکە بۆ عێراق ڕەتدەکەینەوە، چونكە عێراق پێویستی بە هیچ هێزێکی بیانی نییە و بوونی هاوپەیمانیی نێودەوڵەتیش تەنها بۆ ڕاوێژ و ڕاهێنان و زانیاریی ئەمنییە.
ڕاشیگەیاندووە، بەمنزیکانە کاری لیژنە هاوبەشەکەی عێراق و هاوپەیمانیی نێودەوڵەتی دەستپێدەکاتەوە، کە بەشێکی پەیوەستە بە خشتەی کشانەوەی هێزە بیانییەکان لە عێراق.
ڕوونکردنەوەکەی خەفاجی دوای هەواڵێکی کەناڵی (سی بی ئێس)ی ئەمریکی دێت، کە باسی لە جێگۆڕکێکردنی هەزار و 500 سەربازی ئەمریکا دەکرد لە عێراق و سوریا.
