پارێزگاری سلێمانی دەستکردنەوەی بە پڕۆسەی خوێندن ڕاگەیاند و ئاماژەی بەوەکرد، ” پەککەوتنی پڕۆسەی خوێندن زیان بە ئێستا و داهاتوو دەگەیەنێت، کە بە ئاسانی ناتوانرێت قەرەبوو بکرێتەوە”.
ئەمڕۆ دووشەممە، هەڤاڵ ئەبوبەکر، پارێزگاری سلێمانی ڕایگەیاند، ” پەروەردە و فێرکردن ئامانجی سەرەکییە، بۆیە نابێت پرۆسەی خوێندن لە هیچ بارودۆخێکدا بوەستێت، هاوکات دەستکەوتەکانمان بەبێ مامۆستا، بەڕێوەبەر و ناوەندەکانی خوێندن بەدەستناهێندرێت”.
ئاماژەی بەوەشکرد، “ئێمە مووچە بۆیە وەردەگرین بۆئەوەی پڕۆسەی پەروەردە و فێرکردن بەردەوامبێت و خوێندن نەوەستێت، مامۆستایان کۆڵەکەی سەرەکی ئەم پڕۆسەیەن و ئێستا بەهۆی بایکۆتەوە هەڕەشە لەسەر پڕۆسەی خوێندن هەیە، بەڵام ئەوەی هاتووەتە کایەوە ئەنجامە و مامۆستایان لێی بەرپرس نین بەڵکو خراپی حوکمڕانی و بەڕێوەبردن ئەم بارودۆخی هێناوەتە کایەوە”.
ئەوەشی خستەڕوو، ” دۆخی بێ مووچەیی و قەیرانەکان مامۆستا و مووچەخۆرانی گەیاندووەتە ئەم دۆخەی ئێستا کە نەتوانن ئەرکەکانیان جێبەجێبکەن، بەڵام ئەگەر ئامانجەکانمان لە پڕۆسەی خوێندن بکەوێتە مەترسییەوە، دواتر قەرەبووکردنەوەی زەحمەت دەبێت”.
