شارەزایەكی كەشناسی هۆشداری بە هاووڵاتیان دەكات، كە “خۆتان ئامادە بكەن، چلەی زستان” دەستپێدەكات و دەشڵێت: “ئەمڕۆژانە لە هەرە ساردترین کاتەکانی وەرزی زستانە، کە دەکەوێتە چەقی وەرزەکەوە”.
محەمەد كەمال، شارەزای كەشناسی بۆ (خەڵك) ڕایگەیاند، سبەی ١٥-١-٢٠٢٤ بەپێی ڕۆژمێری کوردی چلەی زستانە، کە لە ١٥ ی مانگی 1ەوە دەست پێدەکات و لە ٢٥ ی مانگی 2 کۆتایی دێت، واتە لە (٢٥ ی بەفرانبارەوە بۆ ٥ ی مانگی ڕەشەمێ ).
ڕاشیگەیاند، پێویستە هاووڵاتیان خۆیان ئامادەبكەن، چونكە ئەمڕۆژانە لە هەرە ساردترین کاتەکانی وەرزی زستانە، کە دەکەوێتە چەقی وەرزەکەوە و لە کوردەواریدا وا باوە، کە بڕێکی زۆر لە شەختە و بەفر و باران و تەرزە ڕوو لە ناوچەکان دەکەن لەم ماوەیەدا .
ساڵانە لە 21ی 12ەوە وەرزی زستان دەستپێدەكات تاوەكو 21ی 3 كە دەبێتە سەرەتای وەرزی بەهار، لە ئێستاشدا بەپێی ڕاپۆرتی دامەزراوە كەشناسییەكان، لە زۆربەی ناوچەكانی هەرێم بڕێكی زۆر باران باریوە و لە هەندێك ناوچە گەیشتۆتە دوو هێندەی ساڵی ڕابردوو، بەڵام تا ئێستا بەفر بارین ناو شارە گەورەكانی هەرێمی نەگرتۆتەوە.
