هەناردەکردنی بەرهەمەکانی هەرێمی کوردستان بۆ بازاڕەکانی جیهان بەردەوامی هەیە، وڵاتانی کیشوەری ئەفریقا خواستیان بۆ پەتاتەی هەرێمی کوردستان هەیە.
ماوەی چەند ساڵێکە لە حکومەت و وەزارەتی کشتوکاڵی هەرێمی کوردستانەوە هەوڵەکان بۆ هەناردەکردنی بەرهەمی ناوخۆ بۆ دەرەوەی وڵات دەستیپێکردووە، تا ئێستا هەنار، هەنگوین، دانەوێڵە و چەند بەرهەمێکی دیکە ڕەوانەی وڵاتانی عەرەبی و یەکێتی ئەوروپا کراوە.
لە لێدوانێکیدا بۆ ڕۆژنامەی سەباحی عێراقی، شەیما جەمال ڕاوێژکاری وەزارەتی کشتوکاڵ و سەرچاوەکانی ئاوی هەرێمی کوردستان ڕایگەیاندووە، وڵاتانی ئەفریقا خواستی خۆیان بۆ هاوردەکردنی پەتاتە لە کوردستانەوە دەربڕیوە.
ئاماژەی بۆ ئەوەکردووە، پێش هەناردەکردنی هەر بەرهەمێک دەبێت لیژنەیەکی هاوبەش لەنێوان حکومەتی هەرێمی و ناوەند پێکبهێندرێت، لە چەند قۆناغێکدا لێکۆڵینەوە لە بەرهەمەکە بکرێت، تا بەرهەمەکە سەرجەم مەرجە تەندروستییە جیهانییەکانی تێدابێت و شیاوی هەناردەکردن بێت.
لەماوەی ڕابردوودا حکومەتی هەرێمی کوردستان چەندین بەرهەمی دیکەی کشتوکاڵی هەناردەی دەرەوە کردووە وەک هەنارو هەنگوین و پەتاتە لەم دواییەشدا سێوی هەناردەی دەرەوە کرد و ڕایدەگەیەنێت هەوڵی تەواو هەیە بۆ فراوانتر کردنی ئاستی هەناردەی بەرهەمە کشتوکاڵییەکان.
