لە شەوی سەری ساڵدا لە نەخۆشخانەی لەدایكبوون و ئافرەتانی هەولێر 34 منداڵ لەدایكبوون و پارێزگاری هەولێریش دەڵێت: كابینەی نۆیەم ئەولەویەتی داوەتە كەرتی تەندروستی و بۆ ساڵی تازەش بەرنامە و ئەجیندای تری لە بەردەستدایە.
ئەمشەو دوو شەممە 1ی 1ی 2024، ئومێد خۆشناو، پارێزگاری هەولێر، نەخۆشخانەی لەدایك بوون و ئافرەتانی بەسەركردەوە و دیاری بەسەر ئەو منداڵانە دابەشكرد، كە لەشەوی سەری ساڵ لە دایكبوون.
بەپێی ڕاگەیەنراوێكی پارێزگای هەولێر، ئومێد خۆشناو وێرای نزای تەمەن درێژی بۆ مندڵانی تازە لە دایكبوو، سوپاسی تیمی پزیشكان و كارمەندانی تەندروستی نەخۆشخانەكەی كرد، كە 24 كاتژمێر لە پێناو سەلامەتی دایكان و منداڵان شەونخونی دەكەن.
وتیشی، “كابینەی نۆی حكومەتی هەرێمی كوردستان ئەولەویەتی داوەتە كەرتی تەندروستی و بۆ ساڵی تازەش بەرنامە و ئەجیندای تری لە بەردەستدایە بۆ زیاتر پێشخستنی ئەو كەرتە”.
بەڕێوەبەرایەتی گشتی تەندروستی ھەولێر لە ڕاگەیەنراوێكدا ئاماژەی بەوەكردووە، لە شەوی سەری ساڵدا ٣٤ منداڵ لە دایكبوون، كە ٣٠ منداڵ بە ئاسایی و ٤ منداڵ بە نەشتەرگەری لەدایكبوون.
