پارێزگاری سلێمانی ڕایدەگەیەنێت، بەرجەستەكردنی داوا ڕەواكانی مامۆستایان و موچەخۆران؛ كەشێكی نوێ دەهێنێتە كایەوە و دەشڵێت: ساڵی نوێ؛ مژدە و بەشارەت و بەرات و بەخششی نوێی دەوێت بۆ ئەوەی بتوانێت پیرۆزبێت.
د. هەڤاڵ ئەبوبەكر، پارێگاری سلێمانی لە پەیامێكدا ئاماژەی بەوەكردووە، وەڵامدانەوەی هەوڵی دڵسۆزانەی هەمووان بۆ بەرجەستەكردنی داوا ڕەواكانی مامۆستایان و مووچەخۆران؛ كەشێكی نوێ و سەرەتایەكی نوێ بۆ دروستكردنەوەی متمانە لە نێوان هاووڵاتیان و حكومەت.
دەشڵێت: ” چارەسەركردنی خۆماڵیانەی هاوبەش و لۆژیكی بەرپرسیارێتی لە بوێری بڕیاردان و دەستپێكردنەوەی پڕۆسەی خوێندندا؛ دەهێنێتە كایەوە”.
جەختیشی كردۆتەوە، ئومێد دەكەم، هەموو ئەو هەوڵ و هیممەت و هەنگاوانەی لەم پێناوەدا دراون و نراون؛ بەرهەمداربن و بەپێی ئەو گفت و بەڵێن و پەیمان و گیانی بەرزی بەرپرسیارێتیانەی بە ئێمە دراون؛ بمانگەیەننە ئامانج، هۆكارەكان چارەسەر بكرێن و هەموو خۆ بە براوە بزانین، ساڵی نوێ؛ مژدەو بەشارەت و بەرات و بەخششی نوێی دەوێت؛ بۆ ئەوەی بتوانێت؛ پیرۆزبێت.
ئەمە لەكاتێكدایە، كە لە بەشێكی میدیاكان هەواڵی ئەوە بڵاوكرایەوە، كە وەزیری پەروەردە لەگەڵ بەڕێوەبەری پەروەردەكانی سنووری سلێمانی و هەڵەبجە و گەرمیان و ڕاپەڕین و پارێزگارەكان و سەرپەرشتیاری ئیدارەكان كۆبۆتەوە و “بەڵێنی جێبەجێ كردنی داوای مامۆستایان و فەرمانبەرانی لە پلەبەرزكردنەوە و دامەزراندنی وانەبێژان داوە دوای هەمواركردنی یاسای بودجەی عێراق”.
