![](https://xelk.org/wp-content/uploads/2024/03/awincity2.png)
بەڕێوەبەرایەتی چاودێری بازرگانی سلێمانی دواین بڕیار بۆ نرخی نانی تیری و نانەوا و كێشی گونك ڕادەگەیەنێت و جەختیشدەكاتەوە، 10 نان دەبێت بە هەزار دینار و لە ساڵی نوێوە كاری پێ دەكرێت بۆ ئەو سەموونخانە و نانەواخانانەی ئاردیان بە هەرزان پێ دەدرێت.
دوابەدوای گران بوونی ئارد لە گەڵ سەرهەڵدانی جەنگی ئۆكراینا، نرخی نان و سەموونیش گران بوو، بەڵام لە سەرەتای ئەمساڵەوە نرخی ئارد و گەنم بەشێوەیەكی بەرچاو دابەزیوە، بەڵام ئەوەی تێبینی دەكرێت، تا ئێستا نرخ و كێشی نان وەك پێشتر ئاسایی نەبۆتەوە، كە 8 نان بە كێشی 130 گرام بە هەزار دینار بوو.
لە ئێستادا ئەو شوێنانەی 6 نان “سەموون” دەدەن بە هەزار دینار کێشی گونکەکانیان 130 بۆ 135 گرامە و ئەو شوێنانەی 8 نان “سەموون” دەدەن بە هەزار دینار هەر گونکێکیان 90 بۆ 100 گرامە.
بەپێی زانیارییەكانی (خەڵك)، دوای بڕیارەکەی وەزارەتی بازرگانی هەرێم بۆ دابەزاندنی نرخی ئاردی دابینکراوی نانەواخانە و سەموونخانەكان، بڕیاریش دراوە لە سەرەتای ساڵی نوێوە نرخی 10 نان بكرێت بە هەزار دینار.
لای خۆشیەوە، بڵند ئەحمەد، بەڕێوەبەری چاودێری بازرگانی سلێمانی بە وەکالەت ڕایگەیاندووە، لە ساڵی نوێدا سەرجەم نانەواخانە و سەموونخانەکان پابەند دەکرێن بە هەرزانکردنی نرخ، بەڵام هێشتا بڕیار لەسەر کێشی گونكەكەی نەدراوە.
وتوشیەتی، “نووسراومان لە وەزارەتی بازرگانییەوە پێگەیشتوە، ئارد لە دوو کۆمپانیاوە دابین دەکرێت بۆ نانەواخانە و سەموونخانەکان، بە دوو هەزار دینار کەمتر لە نرخی بازاڕ، بە مەرجێک 10 نان بدەن بە هەزار دینار”.
جەختیشی كردۆتەوە، کارگەکانی نانی تیری دەبێت لە ساڵی نوێوە هەر گونکێک کێشەکەی 175 گرام بێت و سەرجەم کارگەکان 25 نان بدەن بە 8 هەزار دینار.
پێشتریش ڕێكان جەمال، سەرۆكی لیژنە هاوبەشەكانی قائیمقامیەتی سلێمانی بە (خەڵك)ی ڕاگەیاند، لە بەشێكی زۆر لە نانەواخانەوە و فڕنەكانی سەموون (8 نان یان سەموون) كراوەتەوە بە هەزار دینار، بەڵام هەندێكی دیكە ماوە.
وتیشی، “لە ڕێگەی ڕاپۆرتی لیژنە هاوبەشەكانەوە داوا لە قائیمقامیەتی سلێمانی دەكەین، لە ڕێگەی بڕیارێكەوە، 8 نان و سەمون بە فەرمی بكرێتەوە بە هەزار دینار بەهەمان كێش و كوالێتی جاران”.