بڕیارە ئەمڕۆ دادگای فیدراڵی دەربارەی دوو دۆسیەی تایبەت بە مووچە و فەرمانبەرانی هەرێمی کوردستان کۆبێتەوە و ژمارەیەك مامۆستاش لە دانیشتنەکە ئامادە دەبن.
بەپێی خشتەی دانیشتنەکانی دادگای فیدراڵی، ئەمڕۆ یەکشەممە، یەکەم دانیشتنی دادگا دەربارەی سکاڵایەک بەڕێوەدەچێت کە لەلایەن چوار فەرمانبەری ھەرێمەوە لەسەر ھەردوو سەرۆک وەزیرانی عێراق و ھەرێم تۆمارکراوە و داواکراوە دادگا ھەردوو حکومەتی عێراق و ھەرێم پابەند بکات بە جێبەجێکردنی یاسای بودجە و پێدانی مووچەی فەرمانبەرانی ھەرێم و گێڕانەوەی مافەکانیان.
ھەمان ئەمڕۆ دادگای فیدراڵی بۆ جاری دووەم تاوتوێی سکاڵایەک دەکات کە لەلایەن نۆ فەرمانبەری ھەرێمەوە لەسەر سەرۆک وەزیرانی ھەرێم و وەزیری دارایی ھەرێم تۆمارکراوە.
سکاڵاکارەکان، داوایان لە دادگای فیدڕاڵی کردووە حکومەتی ھەرێمی کوردستان پابەند بکات یاسای مووچەی فەرمانبەرانی دەوڵەت وەک خۆی جێبەجێ بکات بەتایبەت ماددەکانی (٦ و ٧ و ٨ و ٩) و بڕیاری ڕاگرتنی پلە بەرزکردنەوەی فەرمانبەرانیش ھەڵبوەشێنێتەوە.
شەوی ڕابردووش ژمارەیەك مامۆستا وێنەی خۆیان لە گۆڕەپانی تەحریرەوە بڵاوکردەوە و ڕایانگەیاند، لەدانیشتنی دووەمی دادگای باڵای فیدڕاڵی دەبین بۆ مەبەستی دەستپیکردنەوەی پلە بەرزکردنەوەی مامۆستایان و فەرمانبەران.
بڕیاربوو ڕۆژی ٢٦یمانگی ڕابردوو دادگا بڕیار لەسەر ئەم سکاڵایە بدات، بەڵام بۆ ئەمڕۆ دواخرا.
