دەستەی سەرپەرشتی مامۆستایانی ناڕازی پشدەر سووربوونی خۆیان لەسەر بەردەوامی بایكۆت ڕادەگەیەنن و دەشڵێن: ” لەئەگەری وەڵام نەدانەوەی حكومەت و بەردەوامبوونیان لەم بێدەنگی و خەم ساردیە لە وەرزی دووەمدا توندتر و گەرم و گوڕتر دەگەڕێینەوە سەر شەقام”.
دەستەی سەرپەرشتی مامۆستایانی ناڕازی پشدەر لە ڕاگەیەنراوێكدا ئاماژەی بەوەكردووە، ئەمڕۆ (١٠٠) ڕۆژ تێپەڕی بەسەر خەباتی مەدەنی و بایكۆتی ناوەندەكانی خوێندن لەلایەن مامۆستایانەوە و لەبری وەڵامدانەوەمان ئەوەتا ڕۆژ بەڕۆژ ناوی تازە بۆ دزینی مووچەكانمان دەدۆزنەوە.
ڕاشیگەیاندووە، بەردەوام دەبین لە درێژەدان بە بایكۆتكردنی ناوەندەكانی خوێندن و فراوانكردن چالاكیە مەدەنیەكان و دەربڕینی ناڕەزایەتیەكانمان و دەشڵێت: “لەئەگەری وەڵام نەدانەوەی حكومەت و بەردەوامبوونیان لەم بێدەنگی و خەمساردیە لە وەرزی دووەمدا توندتر و گەرم و گوڕتر دەگەڕێینەوە سەر شەقام و شەقام دەكەینە ناوەندی پەروەردەكردنی كرداری بۆ دەسەڵاتدارانی هەرێم و پەروەردەی مۆڕاڵ و هەستكردن بە بەرپرسیاریەتیان پێدەڵێین”.
دەقی ڕاگەیەنراوەكە:
ڕاگەیەندراوی كۆبوونەوەی دەستەی سەرپەرشتی مامۆستایانی ناڕازی پشدەر
بەڕێز و بە هەڵوێست، سڵاوی بوێری و خۆڕاگریتان لێبێت
خۆتان دەزانن ئەمڕۆ (١٠٠) ڕۆژ تێپەڕی بەسەر خەباتی مەدەنی و بایكۆتی ناوەندەكانی خوێندن لەلایەن مامۆستایانەوە لەپێناو جێ بەجێكردنی داواكارییە ڕەواكانمان و داكۆكیكردن لە مافی خوراو و موچەی دزراوی مامۆستایان و سەرجەم چین و توێژەكانی تری كۆمەڵگە، بەڵام تاوەكو ئێستا دەسەڵاتی بێباك و خەمساردی هەرێم هیچ وەڵامێكی بۆ داواكانمان نەبووەو بەڵكو لەبری وەڵامدانەوەمان ئەوەتا ڕۆژ بەڕۆژ ناوی تازە بۆ دزینی مووچەكانمان دەدۆزنەوە و ئەمساڵیش لەبری هەوڵدان بۆ سەرپێ خستنەوەی پڕۆسەی پەروەردە دوای تێپەڕینی وەرزێكی خوێندن بەتەواوی هاتن بەناوی (شایستەی دارایی خەرجنەكراو )!مووچەی سێ مانگی ئەمساڵمانیان خستە سەر خەرمانی دزییەكانیان …
لەبەر ئەوە ئێمە وەك دەستەی سەرپەرشتی مامۆستایانی ناڕازی پشدەر دوای ئەنجامدانی كۆبوونەوە ڕایدەگەیەنین: كە بەردەوام دەبین لە درێژەدان بە بایكۆتكردنی ناوەندەكانی خوێندن و فراوانكردن چالاكیە مەدەنیەكان و دەربڕینی ناڕەزایەتیەكانمان، لەئەگەری وەڵام نەدانەوەی حكومەت و بەردەوامبوونیان لەم بێدەنگی و خەم ساردیە لە وەرزی دووەمدا توندتر و گەرم و گوڕتر دەگەڕێینەوە سەر شەقام و شەقام دەكەینە ناوەندی پەروەردەكردنی كرداری بۆ دەسەڵاتدارانی هەرێم و پەروەردەی مۆڕاڵ و هەستكردن بە بەرپرسیاریەتیان پێدەڵێین،
وە لێرەوە ڕایدەگەیەنین بە هاماهەنگی لەگەڵ هاو پیشە و برایانمان لە سەرجەم ناوچەكانی تر پلانی جیاوازمان هەیە بۆ توندكردنی فشارەكانمان بۆسەر دەسەڵات بە ڕێگاو شێوازی خەباتی مەدەنی جۆراو جۆر و جیاواز كە لە داهاتودا و لەسەرەتا و دەستپێكی وەرزی دووەمدا دەسەڵاتدارانی پێ شۆك دەكەین.
وە لە ئێستادا و بەهۆی تەواو بوونی وەرزێكی خوێندن و وەستانی چالاكیەكانی شەقام لە سەرجەم ناوچەكانی بایكۆت و وەك پێدانی دەرفەتێكی زەمەنی دیاریكراو بە دەسەڵات، ئێمەش چالاكیەكانی شەقاممان هەڵپەسارد تا سەرەتای وەرزی دووەم و ساڵی تازە، بەڵام لەئەگەری هەر هەوڵێكی دەسەڵات بۆ فشار خستنەسەر مامۆستایان و شكاندنی بایكۆت لەم ماوەیەدا بەبێ دەستكەوت ڕاستەوخۆ دێینەوە سەر شەقام و بەچالاكی بەرفراوان وەڵامیان دەدەینەوە.
لەكۆتایدا دەڵێین بەردەوامی و خۆڕاگری و كۆڵنەدان زامنی بەدیهێنانی ئامانج و داواكاریەكانمانن بۆیە دەڵێین بەپشتیوانی ئێوەی بوێر و ماندوو نەناس بایكۆت بەردەوامە و بەردەوام دەبێت و ئێمە جگە لە وەڵامدانەوەی داواكاریەكانمان هیچ شتێكی تر نامان باتەوە ناوەندەكان خوێندن و بەهیچ جۆرێك سازش لەسەر مافەكانمان ناكاین و تا دوا هەنگاو لەپێناویاندا دەجەنگیین…
دەستەی سەرپەرشتی مامۆستایانی ناڕازی پشدەر
شەممە ٢٠٢٣/١٢/٢٣
