یانەی وەرزشی هەولێر ئاشكرای دەكات، كە كێشەی مووچەی یاریزانانی تۆپی پێی یانەكەیان لە كۆتایی نزیك دەبێتەوە و دەشڵێت: “لەلایەن سەرۆك وەزیرانی عێراقەوە بەڵێنی خەرج كردنی مووچەكانیان پێ دراوە”.
ئیبراهیم قادر، ئەندامی تیمی ڕاگەیاندنی یانەی وەرزشی هەولێر بۆ ئاژانسی (المعلومە) ڕایگەیاندووە، قەیرانی دارایی یانەی هەولێر بەرەو كۆتایی دەڕوات و وەلید عارەب، سەرۆكی یانەكە بەڵێنی پێدراوە لەلایەن حكومەتی خۆجێیی و محەمەد شیاع سودانی، سەرۆك وەزیرانی عێراقەوە بۆ خەرج كردنی شایستە داراییەكانیان بەزووترین كات.
ڕاشیگەیاندووە، مووچەی یاریزانان لەماوەی دوو هەفتەی داهاتوودا خەرج دەكرێت و ئەو كاتەش جەختی لێ كراوەتەوە.
جەختیشی كردۆتەوە، خەرج كردنی مووچەی یاریزانان دەبێتە پاڵپشتێكی گەورە و هاندانیان تاوەكو باشترین ئاست پێشكەش بكەن لە خوولی ئەستێرەكانی عێراق و تیپەکە هەوڵدەدات هاندەران ئاشت بکاتەوە و وێنەی خۆی لە پێشبڕکێکەدا باشتر نیشان بدات.
ئەمە لەكاتێكدایە، كە ئەمڕۆ شەممە، یانەی هەولێر ڕووبەڕووی یانەی زەورا دەبێتەوە لەچوارچێوەی كێبڕكێی بەشی 11ی خوولی ئەستێرەكانی عێراق.
