ئەمڕۆ چوارشەممە سەرچاوەیەک لە پۆلیسی بەغدا ڕایگەیاند، ئاگر لە یەکێک لە بازاڕەکانی شاری بەغدای پایتەخت کەتووەتەوە و بەهۆیەوە بەشێکی زۆر لە دوکان و کۆگاکانی بازاڕەکە سوتاون و زیانی گەورەیان پێگەیشتووە.
پۆلیسی بەغدا ئاماژەی بەوەشکردووە، ئاگرەکە زۆر گەورەبووە و بەهۆیەوە چەندین دووکان و کۆگای گەورە سووتاون و ڕووداوەکەش بەدیاریکراوی لەشەقامی فەلەستین ڕوویداوە.
باسی لەوەش کردووە، دوای کەتەنەوەی ئاگرەکە تیمەکانی بەرگری شارستانی بەخێرایی گەیشتوونەتە شوێنی ڕووداوەکە و ئاگرەکەیان کۆنترۆڵ کردووە، وتیشی بەشێک لەو کۆگایانەی سووتاون تایبەتبوون بە کەرەستە کارەباییەکان.
پۆلیسی بەغدا ئەوەشی خستووەتەڕوو، دەنگۆی ئەوە هەیە کە ئاگرەکە زیانی بە دامەزراوە و فەرمانگە حکومییەکان گەیاندووە، بەڵام ئەو جۆرە هەواڵانە لەراستییەوە دوورن.
هاوکات، لەسەرەتای ئەمساڵەوە هەتا مانگی ئاب زیاتر لە ١٨ هەزار ڕووداوی ئاگرکەوتنەوە لەعێراقدا تۆمارکراوە.
