ئەمڕۆ سێشەممە 19ی كانوونی یەكەم، شارەزایەکی کەشناسی هاتنی شەپۆلە سەرماکەی بۆ هەرێم ڕاگەیاند و پێشبینی دەکات لە کۆتایی ئەم هەفتەیەدا بەفر و باران ببارێت.
شاڵاو هیدایەت شارەزای بواری كەشناس رایگەیاند، پێشبینی دەكەین لە 22 و 23 و 24ی ئەم مانگە، شەپۆلێكی سەرانسەری بارانبارینی باش هەموو ناوچەكان بگرێتەوە، بە كاریگەری و بڕی جیاواز و بەشێوەی دێمی و زستانی، لە ئەنجامی چالاكبوونی نزمە پاڵەپەستۆیەكی دەریای ناوەڕاست بەڕووی ناوچەكە، هاوكات تۆپەڵە هەوایەكی شێداری مەداری لاواز تێكەڵ بە شەپۆلەكە دەبێت.
وتیشی “لە ناوەڕاست بۆ كۆتایی شەپۆلەكە بەهۆی دابەزین و تێكەڵبوونی بارستە هەوایەكی ساردی جەمسەری باكوور، ئەگەری بەفربارین دەبێت ، بەو هۆیەوە لە بەشێكی ناو سەنتەری ناوچە شاخاوییەكان ئەگەری بەفربارین دەبێت.”
