لەسنووری قەزای پێنجوێن و ناوچە شاخاوییەکانى ناحیەى ناڵپارێزى سەر بە قەزاکە، دەیان کورەی بەرهەمهێنانی خەڵوز ڕوخێنران، پۆلیسی دارستان و ژینگەی پێنجوێن ئاماژە بەوەدەکەن خەڵک لە بێ کاریدا ئەو کارە دەکەن و لەوڕێگەیەوە بژێوییەکیان دەست دەکەوێت.
ئەمڕۆح سێشەممە، لەلایەن مەفرەزەیەکى بنکەى پۆلیسى دارستان و ژینگەى ناڵپارێز و پۆلیسى پێنجوێن و ئاسایشى ناڵپارێز، لە هەردوو گوندى زەردۆیى و دۆڵەچەوت ٥٩ کورەى دروستکردنى خەڵوز بەتەواوی تێکدران.
موقەدەم عادل جەلال، بەڕێوەبەرى پۆلیسى دارستان و ژینگەى پێنجوێن باسی لەوەکردووە، هۆکارى بونى ئەم هەموو کورەى خەڵوزە لە سنورى قەزای پێنجوێن و ناحیەی ناڵپارێز بۆ نەبوونی ئیش و کار دەگەڕێتەوە، جگە لەوەش ناڵپارێز و سنورەکە شاخاوییە و دوورە دەست و دابڕاون لە چاوى خەڵک.
دەشڵێت، دانانی کورەی خەڵوز نایاساییە و هیچ ڕێگەیەکی یاسایی بۆ دانانی نییە، بە وتەى عادل جەلال، ساڵانى پێشتر مۆڵەت دەدرا، بەڵام ئێستا نە خەڵک داوا دەکات و نە مۆڵەتیش دەدرێت بۆ ئەوەى بە شێوەى یاسایى کورە دابنرێت.
پۆلیسى دارستان و ژینگەی پێنجوێن لەبارەی بەردەوامی دروستکردنی کوورەکانی بەرهەمهێنانی خەڵوز و بنبڕنەبوونی سەرەڕای ئەوەی نایاساییە دەڵێت، “، تاڕادەیەک توانیویانە ڕێگرى بکەن، بەڵام بەهۆى سەختى و شاخاویبونى ناوچەکە، ناتوانن ٪١٠٠ کۆنتڕۆڵى بکەن”.
