ئیسماعیل حەمە
قسەیەک هەیە دەڵێ لەدەرگاوە دەرمانبکەن، لەپەنجەرەوە دێینە ژوورەوە،زۆرجار بۆ پەردەپۆشکردن و دیزە بەدەرخۆنەکردنی کێشەکان، بەرپرسانی هەرێم نایانەوێ دەنگی ڕاستەقینەی گەلی کورد بگاتە ناوەدی قەراری بەغداد.
پەنگخواردنەوەی کێشەکان و هەوڵدان بۆدەربازبوون، زۆرجار بیر لە ڕێگەی جیاوازدەکرێتەوە، لەو چوارچێوەیەشداو بۆ گەیاندنی ڕاستییەکان بەوکەسانەی دەتوانن قسەیەکی خێر بکەن لە بەرژەوەندی دانیشتوان و فەرمانبەرانی هەرێم، لەگەڵ چەند هاوڕێ و خەمخۆرێک توانیمان چاومان بەچەند کەسایەتی سیاسی و کۆمەڵایەتی بکەوێت، لەنێویاندا بەڕێز(عبدالمهدی کربلائی) نوێنەری سەید علی سیستانی، گەورە مەرجەعی شیعەکانی عیراق.
دوای ڕاگۆڕینەوەی چەند باسێک و لەدانیشتنێکی سەعاتیدا باسیشمان لەدۆخی هەرێم و خۆپیشاندانەکانی فەرمانبەران و مامۆستایان و دواکەوتنی موچەکانیان کرد.
ئاماژەمان بەگرانی نرخی سوتەمەنی و بانزین بە بەراورد بەشارەکانی دیکەی عیراق کرد، کەربەلائی سەرسوڕمانی خۆی دەربڕی بۆ دۆخی هەرێمی کوردستان و جەختیکردەوە کە نەیان زانیوە نرخی سوتەمەنی بەو شێوەیە گرانە، بەڵام وتی: ئاگاداری دواکەوتنی موچەو ئیمتیازاتی هەرێمم.
سەبارەت بەهۆکاری کێشەکانیش شێخ عبدالمهدی ڕوونیکردەوە کە زۆر جار هەوڵمان داوە و لەگەڵ سەرۆکوەزیران و بڕیار بەدەستانی عیراق قسەمان کردووە، بەڵام هەموو وەڵامەکان ئەوە دەڵێن، کە حکومەتی هەرێم ئامادەنییە هیچ داتاو زانیارییەکی فەرمانبەران بدات بە حکومەتی عیراق.
هەر لەو دیدارەدا نوێنەری مەرجەعی بەڕێز سیستانی وتی: ئەگەر حکومەتی هەرێم داتاکانی فەرمانبەران بداتە دەست وزارەتی دارایی، بەدڵنیاییەوە هەروەک چۆن حکومەت موچەی فەرانبەرانی موسڵ و بەسرەو خانەقین لەسەری مانگدا دەدات ئاواش موچەی هەرێم دەنێرێت.
شێخ عبدالمهدی پیاوێکی تەمەن ٧٤ساڵی نەرمونیانی گوێگری لەسەرخۆیە، بەهۆی نەخۆشییەوە ماوەیەکە لەسەر جێگەکەی ڕاکشاوە و ناتوانێ وەکجاران بچێتەزیارەت، بەڵام خانوو ژوورە موتەوازیعەکەی لەنزیک عەتەبەی ئیمام حسینە لەشاری کەربەلا.
ئەم پیرە پیاوە بەدەم خواردنەوەی چاییەکەیەوە، دووبارەی کردەوە تەنها حەل بۆدەربازبوون لەوقەیرانە، ناردنی داتاو زانیاری ڕاست و دروستی فەرمانبەرانی هەرێمە بە بەغدا، ئەگینا چۆندەکرێت پارە بدرێتە دەست ئیدارەیەک نەزانی چۆن خەرج دەکرێت و نەزانی دەدرێتە کێ؟.
