دەزگای ئاسایشی هەرێم ئاماری کار و چالاکییەکانی بەڕێوەبەرایەتییەکانی بڵاوکردەوە و ڕایگەیاند، لە ماوەی ئەمساڵدا لەلایەن دەزگای ئاسایشی هەرێم ٥ هەزار و ٨٠٦ کەس دەستگیرکراوە.
ئەمڕۆ پێنجشەممە، عەمید پشتیوان بەھادین، بەڕێوبەری بەڕێوبەرایەتی لێکۆڵینەوەی دەزگای ئاسایشی ھەرێم لە کۆنگرەیەکی ڕۆژنامەوانیدا ئاماری کار و چالاکییەکانی بەڕێوەبەرایەتییەکانی ڕاگەیاند.
چالاکییەکانی بەشی بەڕێوەبەرایەتی ئۆپەراسیۆنەکان و تیرۆر: ژمارەی ئۆپەراسیۆنەکان ١٨٧ ئۆپەراسیۆن، گەڕان بەدوای تۆمەتباران ١٥، دەستگیرکردنی تۆمەتباران ٣٣١، هاوکاری هێزە ئەمنییەکان ٦٦، هاوکات ئەنجامدانی تاوانە ئەلیکترۆنییەکان ٣هەزار و ٣٨ حاڵەت بووە.
سەبارەت بە تاوانەکانی ماددەی هۆشبەر ٩٩١ حاڵەت لە خۆدەگرێت کە پێکدێت لە: ( بازرگانیکردن بە ماددەی هۆشبەر ٨٤، بەکارهێنەر ٦٥٣، فرۆشیار ٢٥٤، دەستیشگیراوە بەسەر ٣٩٨ کیلۆ ماددەی هۆشبەر)، هاوکات بەشی کۆچی نایاسایی و بازرگانیکردن بە مرۆڤەوە لە دەزگای ئاسایشی هەرێم چالاککراوە و لەو بارەیەوە ٢٣٣ حاڵەت هەبووە.
بەشی ئابووری دەزگای ئاسایشی هەرێم بە هەماهەنگی لەگەڵ قائیمقامیەتەکان و دەزگاکانی ئیدارە سەربەخۆکانی هەرێمی کوردستان چەندین سەردانی ئەنجامداوە و ژمارەی سەردانیکردنی لیژنە هاوبەشەکان ٣٤ هەزار و ٧٣٠ سەردانیکردن بووە، پسوڵەی ئاگادارکردنەوە ٢ هەزار و ١٧١، پسوڵەی سەرپێچی ٣ هەزار و ٣٨٥ پسووڵە بووە، ١١٥ دوکان داخراون، بڕی تاوانەکردن (غەرامە) ٧٨٥ ملیۆن و ٢٠٠ هەزار دینار بووە، ٥٩٠ تۆن و ٣٠٥ کیلۆ مەوادی بەسەرچوو دەستی بەسەردا گیراوە و ٢٥ کەیس ڕەوانەی دادگا کراوە.
سەبارەت بە ساختەکردنی دراو ٢٤ کەیس هەبووە و هەوڵی ڕێگریکردن لێی دراوە، لەگەڵ ئەوەشدا ٦٤ کەیسی سپیکردنەوەی دراو هەبووە.
ئاماژەی بەوەشکرد، لە ماوەی ئەمساڵدا ٦٧ حاڵەتی خۆکوشتن و ١٢٧ کوشتن هەبووە، ٧١١ ڕووداوی تەقەکردن ٧١١ هەبووە، لەگەڵ ئەوەشدا ڕێگری کراوە لە بازرگانی کردن بە چەک و تەقەمەنی ١٠١ حاڵەت هەبووە، ٥٧٤ ئۆتۆمبیل دەستی بەسەرداگیراوە، هاوکات ٤٩٦ جۆر چەکی جیاواز و ٩٢٥ جۆری تەقەمەنی دەستی بەسەرداگیراوە.
