بانکی ناوەندیی عێراق ڕایگەیاند، مامەڵە بازرگانییەکانی عێراق و ئیمارات لە ئەمڕۆوە بە دۆلار ناکرێت، بەڵکو بە درهەم ئەنجامدەدرێن.
ئەمڕۆ چوارشەممە، بانکی ناوەندیی عێراق لە ڕاگەیەندراوێکدا ڕایگەیاند، لەگەڵ گرووپی بانکی (ئەبوزەبی یەکەم) ی ئیماراتی ڕێککەوتن بۆ ئەنجامدانی مامەڵە بازرگانییەکان بە درهەم، کە لە ڕێگەی ئەو ڕێککەوتنەوە سەرجەم ڕێوشوێنەکانی حەواڵە، پارەدارکردن، بازرگانی و هاوردە لە نێوان هەردوو وڵات بە درهەمی ئیماراتی ئەنجامدەدرێت.
بانکی ناوەندیی عێراق ڕاگەیەندراوێکی بڵاوکردەوە و ڕایگەیاند، پارێزگاری بانکی ناوەندی لەگەڵ سەرۆکی بانکەکە کۆبووەتەوە، هاوکات ڕێکارەکانی مامەڵەکردنیی بازرگانی و حەواڵەی پارە تەوەری سەرەکی گفتوگۆکان بووە.
لە ڕاگەیەندراوەکەدا ئاماژەی بەوەشکرد، لە ئەمڕۆ چوارشەممەوە، سەرجەم مامەڵەکانی حەواڵە و بازرگانی لەگەڵ ئیمارات بە درهەم دەکرێن، کە لە قۆناغی یەکەمدا پێنج بانکی عێراقی بەشدارن و دواتر قۆناغ بە قۆناغ ژمارەیان زیاد دەکرێت.
ئەمە لە کاتێکدایە، بانکی ئەبوزەبی یەکەم- FAB یەکێکە لە گەورەترین و بەهێزترین دامەزراوە داراییەکان لەسەر ئاستی جیهان، کە پلەبەندییەکەی بە AA- دیاریکراوە و کۆی سەرمایەکەی نزیکەی ٣٠٠ ملیار دۆلارە.
