فڕۆکەیەکی جەنگیی سوپای ئەمریکا لە کاتی مەشقکردندا لە کەناراوەکانی کۆریای باشوور کەوتە خوارەوە.
ئەمڕۆ دووشەممە، فەرماندەیی هێزی ئاسمانیی ئەمریکا ڕایگەیاند، فڕۆکەیەکی جۆری ئێف 16ی هێزەکانیان لە کەناراوەکانی دەریای زەرد لە کۆریای باشوور کەوتە خوارەوە.
ڕوونیشیکردەوە فڕۆکەکە لە کاتی مەشقکردنی ئاساییدا بووە کاتێک بە هۆی کێشەیەکی تەکنیکی لەناکاوەوە کەوتووەتە خوارەوە، بەڵام فڕۆکەوانەکەی سەلامەتە و بەپەڕەشووت خۆی هەڵداوە.
فەرماندەیی هێزی ئاسمانی ئەمریکا ئەوەشی خستەڕوو کە فڕۆکەوانەکە لە لایەن هێزی دەریایی کۆریا باشوورەوە ڕزگار کراوە و گواستراوەتەوە بۆ بنکەی ئاسمانیی کۆنسان کە دەکەوێتە باشووری ڕۆژئاوای کۆریای باشوورەوە.
