دامەزراوەیەکی ئابووری عێراقی لەو بڕوایەدایە کە نزیکەی 93 ترلیۆن دینار لە دەرەوەی سیستمی بانکی عێراقدا هەیە و هاووڵاتییان لای خۆیان گلیان داوەتەوە کە بە پارەی “خەوێندراو” ناودەبرێت.
دامەزراوەی “عێراقی موستەقبەل” بۆ توێژینەوە و راوێژکاری ئابووریی، ڕاپۆرتێکی دەربارەی دۆخی دراوی نەخت بڵاوکردەوە و ڕایگەیاند، لە سەرەتای ساڵی 2022دا بەهای دراوی چاپکراو 78 ترلیۆن دینار بووە، بەڵآم لە کۆتایی ئەمساڵدا گەیشتووەتە 102 ترلیۆن دینار و ڕێژەکەی 9.24٪ بەرزبووەتەوە.
لە ڕاپۆرتەکەدا ئەوە خراوەتەڕوو کە بڕی ئەو پارەیەی لە دەرەوەی سیستمی بانکی عێراقدایە دەگاتە نزیکەی 93 ترلیۆن دینار و ئەوەش بە بەراورد لەگەڵ ساڵی 2022 بە ڕێژەی 30٪ی زیادیکردووە.
بە پێی ئامارەکانی وەزارەتی پلاندانان، نزیکەی 12 ملیۆن هاووڵاتی کە تەمەنیان لەسەروو 15 ساڵییەوەیە، بیمەی کۆمەڵایەتی وەرناگرن و بە پێی ڕاپۆرتی دامەزراوەکەش هەریەك لەم 12 ملیۆن کەسە نزیکەی حەوت ملیۆن و 200 هەزار دیناریان لە ماڵەوە هەڵگرتووە.
ڕوونیشیکردەوە کە سەرباری دابەزینی بەهای دینار و بەرزبوونەوەی ڕێژەی هەڵاوسان، بەڵام بە بەراورد بە 2022، ڕێژەی پارەی خەوێندراوی هەر هاووڵاتییەك 4٪ زیادیکردووە.
پارەی خەوێندراو بەو پارەیە دەوترێت کە هەر هاووڵاتییەك دوور لە سیستمی بانکی هەڵیگرتووە و بۆ وەبەرهێنان و کڕینی پێداویستی بەکاری ناهێنێت.
دامەزراوەی عێراقی موستەقبەل لە کۆتایی ڕاپۆرتەکەیدا ئەوەشی خستووەتەڕوو کە هەندێك کەس ئەو ژمارانە بە لۆژیکی نازانن، چونکە هاووڵاتییان بە دەست بێ پارەیی و خراپی دۆخی کۆمەڵایەتییەوە دەناڵێنن، بەڵآم لەگەڵ ئەوەشدا بەرگری لە داتا خەمڵێنراوەکانی خۆی دەکات و دەڵێت: “بانکی ناوەندی لە ماوەی دوو ساڵدا زیاتر لە 24 ترلیۆن دیناری چاپکردووە و زیاتر لە 22 ترلیۆنی لای هاووڵاتییان خەوێندراوە”.
