وەزارەتی کشتوکاڵ و بازرگانی عێراق بڕیاریدا کارتی بانکی کشتوکاڵی بۆ سەرجەم جوتیارانی عێراق و ھەرێمی کوردستان دروست بکرێت.
بەڕێوەبەری بەرنامەی کارتی کشتوکاڵی حکومەتی عێراق رایگەیاند، پڕۆژەکە مانگێکی دیکە بەفەرمی دەکەوێتەبواری جێبەجێکردنەوە و ھەموو پارێزگاکانی عێراقیش دەگرێتەوە بەهەرێمی کوردستانیشەوە.
ئەیاد پۆڵانی، ئاماژەی بەوەشکرد، ھەموو جوتیارێک کارتێکی کشتوکاڵی بۆ دروست دەکرێت و لەو کارتەدا ھەموو چالاکییەکانی جوتیار وەک زەوییەکانی، پلانی داچاندن، وەرگرتنی بنەتۆو و قەرزکردنەکانی لەرێگەی ئەو کارتەوە راییدەکرێت.
بەگوێرەی بڕیارەکەی حکومەتی عێراق، کارتی کشتوکاڵی دەبەسترێتەوە بە وەزارەتی بازرگانیشەوە و شایستەی دارایی جوتیاران لەرێگەی ئەو کارتەوە خەرج دەکرێت.
لە ماوەکانی ڕابردوودا حکومەتی عێراق بە چەند گوژمەیەک پارەی گەنمی جوتیارانی هەرێمی ڕەوانەکرد و حکومەتی هەرێم بەسەر جوتیاراندا دابەشیکرد.
