دەروازی پەروێزخان لەسنووری گەرمیان لەنێوان هەرێم و ئێراندا یەکێکە لە دەروازە نێودەوڵەتییەکان لەنێوان هەردوو وڵاتدا کە ئاڵوگۆڕی بازرگانی تێدا دەکرێت و بەگوێرەی زانیارییەکان لەدوای مانگی ئازاری ئەمساڵەوە ئێران بە بەهای زیاتر لە ٦٥٠ ملیۆن دۆلار كاڵا و شمەكی لەو دەروازەیەوە هەناردەوی هەرێمی كوردستان و عێراق كردووە.
عەلی ئەسغەر عەباس، سەرپەرشتیاری فەرمانگەی گومرگی پارێزگای كرماشان ڕایگەیاند، لە هەشت مانگی یەكەمی ئەمساڵی ئێراندا کە (لە ٢١ی ئازاری ڕابردووەوە دەستپێدەكات) ملیۆنێك و ٨٨٢ هەزار و ٧٦٦ تۆن كاڵا و شمەك لە دەروازەی سنووریی پەروێزخانەوە هەناردەی عێراق و هەرێمی کوردستان کراوە.
بەگوێرەی وتەکانی عەلی ئەسغەر بەهای شمەكە هەناردەکراوەکانی ئێران بۆ عێراق و هەرێمی کوردستان دەگاتە ٦٥٩ ملیۆن و ٨٨٧ هەزار و ٤٧٢ دۆلار.
ئاماژەی بەوەشکردووە، هەناردەی کاڵاو شمەک بەراورد بە هەمان ماوەی ساڵی رابردووی ئێرانی لە دەروازەكەوە بە بڕی ٢٠٪ لەڕووی بەها و ٣٤٪ لەڕووی كێشەوە زیادیكردووە،.
ئەوەش لەکاتێکدایە، زۆرینەی ئەو شمەكانەی ئێران هەناردەی كردوون بریتین لە، (چیمەنتۆ، پلێتی ئاسن، ئاسنی گالڤانایز، پۆڵا، سیرامیك، بەرهەمە پلاستیكییەكان، كێك و بسكیت).
سەرپەرشتیاری فەرمانگەی گومرگی پارێزگای كرماشان ئاماژەی بەوەشکردووە،لەهەمان کاتدا لە دەروازەی شوشمێوە بڕی ١٩٦ هەزار و ٧٣١ تۆن شمەک هەناردەكراوە كە بەهاكەی دەگاتە ٢٦ ملیۆن و ٨٣٦ هەزار و ٣٢٣ دۆلار.
