سبەی شاندێکی حکومەتی هەرێم بۆ تاوتوێکردنی پرسی بوودجە و مووچە و هەناردەی نەوتی هەرێم دەچێتە بەغدا،
فەرمانگەی میدیا و زانیاری ئەمڕۆ یەکشەممە لە راگەیاندراوێکدا بڵاویکردەوە، سبەی شاندێکی حکومەتی هەرێمی کوردستان بە سەرۆکایەتی ئاوات جەناب، وەزیری دارایی بۆ تاوتوێکردنی پرسی بوودجە و مووچە دەچیتە بەغدا.
چوونی شاندەکەی هەرێم لە کاتێکدایە، حکومەتی هەرێم داوای سێ مووچەی کۆتایی ئەمساڵی لە حکومەتی عێراق کردووە، هاوکات هەناردەکردنەوەی نەوتی هەرێم تەوەری سەرەکی کۆبوونەوەکە دەبێت و پاکتاوی حسابی دارایی شەش مانگی ئەمساڵ دەکەن.
سەردانى شاندى هەرێم بۆ بەغدا لەکاتێکدایە، حکومەتی هەرێم، ئەمڕۆ ڕایگەیاند لیستی مووچەی مانگی نۆ ئامادەیە و چاوەڕوانی گەشتنی پارەی بەغدان بۆئەوەی دەست بە دابەشکردنی مووچە بکەن، بەم پێیەش بێت تا ئێستاش چارەنووسى مووچەى سێ مانگی کۆتایی ئەمساڵ بە نادیاری ماوەتەوە.
