وتەبێژی وەزارەتی پەروەردەی عێراق ڕایگەیاند، بە مەبەستی دابینکردن و وەرگرتنی بڕە پارەیەکی مانگانە (دەرماڵە) ناوی زیاتر لە دوو ملیۆن خوێندکار و قوتابییان ناردووە بۆ فەرمانگەی تۆماری شایستەکان.
کەریم سەید، وتەبێژی وەزارەتی پەروەردەی عێراق ڕایگەیاند، ناوی زیاتر لە دوو ملیۆن قوتابی و خوێندکار تۆمارکراوە تاوەکو لە ساڵی خوێندنی ٢٠٢٣-٢٠٢٤ بە شێوەی مانگانە بڕێک پارە وەربگرن.
وتیشی، پێداچوونەوە و وردبینی بۆ ناوی خوێندکارەکان کراوە و ڕەوانەی لایەنی پەیوەندیدار کراوە، بۆ ئەوەی دەست بە دابەشکردنی دەرماڵەی خوێندکاران و قوتابییان بکرێت، کە لە ڕێگەی هەژماری بانکییەوە حەواڵەی بەخێوکەری خوێندکارەکە دەکرێت.
هاوکات لە یاسای بودجەی ساڵی ٢٠٢٣ بڕێک پارە بە شێوەی مانگانە بۆ قوتابی و خوێندکارانە تەرخانکراوە، بڕە پارەکەش بۆ قوتابیانی قۆناغی بنەڕەتی ٣٠ هەزار دینارە و بۆ خوێندکارانی ناوەندی و ئامادەییش ٥٠ هەزار دینارە.
