بۆ دووەم ڕۆژ لەسەر یەك ژمارەیەك دیلی ئیسرائیلی و فەلەستینی ئاڵوگۆڕ دەكرێت و یانەی دیلە فەلەستینییەکان ئاشكرای دەكات، تا ئێستا زیاتر لە 3 هەزار كەس لەلایەن ئیسرائیلەوە دیل كراون.
بەرپرسێکی ئیسرائیل بۆ ئاژانسی (ڕۆیتەرز) ڕایگەیاندووە، بزووتنەوەی حەمماسی فەلەستینی ئەمڕۆ 14 كەسی بە بارمتەگیراو ئازاد دەکات و لە بەرامبەریشدا ئیسرائیل 42 دەستگیرکراوی فەلەستینی ئازاد دەکات.
لای خۆشیەوە، یانەی دیلە فەلەستینییەکان لە بەیاننامەیەكدا ئاشكرای كردووە، سوپای ئیسرائیل لە سەرەتای هێرشەکانی 7ی تشرینی یەکەمەوە تاوەکو ئێستا سێ هەزار و 160 فەلەستینی دەستگیرکردووە.
هاوكات (ئۆرشەلیم پۆست) بڵاویكردۆتەوە، سوپای ئیسرائیل بەڕێوەبەری نەخۆشخانەی شیفای لە غەزە دەستگیرکرد.
