سبەینێ مامۆستایانی ناڕازی هەرێمی کوردستان دەچنە بەغدا و لە گۆڕەپانی تەحریر خۆپیشاندان ئەنجامدەدەن، هاوکات لەگەڵ لیژنەیی دارایی و پەروەردەیی ئەنجومەنی نوێنەرانی عێراق کۆدەبنەوە، کێشە و گرفتی مووچەخۆرانی هەرێم تاوتوێ دەکرێت.
ڕۆژی پێنجشەممە، مامۆستایانی ناڕازی لە دوای داواکەرییەکەی ئەنجومەنی بەڕێوەبەرایەتی گشتی پەروەردەی سلێمانی سەبارەت بە شکاندنی بایکۆت و گەڕانەوەی مامۆستایان بۆ هۆڵەکانی خوێندن ڕوونکردنەوەیەکیان بڵاوکردەوە و ڕایانگەیاند، “تا چارەسەڕی ڕیشەیی بۆ پرسی مووچە درێژە بە بایکۆت ناڕەزایەتیەکان دەدەین”.
هاوکات دوێنێ مامۆستایان و فەرمانبەرانی ناڕازی لە کۆنگرەیەکی ڕۆژنامەوانیدا ڕایانگەیاند، “رۆژی یەکشەممە لە دادگای باڵای فیدراڵی دەبین بۆ بەرگریکردن لە ژیان و گوزەرانی هەمووان، هاوکات رۆژی دووشەممە، لە ١٣ شار و شارۆچکەی هەرێمی کوردستان لە شەقام دەبین و وەڵامی ئەوانە دەدەینەوە کە نابەرپرسانە داوای دەوامکردنی بێ مووچە دەکەن”.
سبەینێ مامۆستایان دەچنە بەغدا؟
ئەمڕۆ بەرهەم مستەفا، ئەندامی سکرتاریەتی یەکێتی مامۆستایانی کوردستان بۆ (خەڵک) ڕایگەیاند، “بەیانی مامۆستایان لە شار و شارۆچکەکانی هەرێمەوە دێنە بەغدا و لە گۆڕەپانی تەحریر خۆپیشاندان ئەنجامدەدەن، بە مەبەستی گەیاندنی ئەو نا دادی و مافخورانەی لەلایەن حکومەتی هەرێمی کوردستانەوە بەرامبەر مووچەخۆران ئەنجامدەدرێت”.
وتیشی، “ئێمە چەند مامۆستایەکین پێشوەختە هاتووین بۆ بەغدا و سەرقاڵی ئامادەکارییەکانین بۆ خۆپیشاندانەکەی سبەینێ و پێشوازی لەو هاوڕێیانەمان دەکەین کە لە هەرێمەوە بە مەبەستی خۆپیشاندان دێنە بەغدا”.
سەبارەت بە ئامانج و مەبەستی چوونی مامۆستایان بۆ بەغدا بەرهەم مستەفا ڕوونیکردوە، “مامۆستایان پێکەوە بە هەماهەنگی دابەشبووین بەسەر چەند گروپێکدا کە بەشێکمان سکاڵای یاسایی لەسەر حکومەتی هەرێم تۆمار دەکەین، لەسەر دواکەوتن و خواردنی چەند مووچەیەکی مووچەخۆران، داواکردنی گێڕانەوەی پلەبەرزکردنەوە و دامەزراندنی وانەبێژان”.
باسی لەوەشکرد، “بەشێکی دیکەمان لەگەڵ لیژنەی پەروەردەیی و لیژنەی دارایی ئەنجومەنی نوێنەرانی عێراق کۆدەبێتەوە، سەرجەم پلان و بەرنامەکانمان لە پێناو بەدیهێنانی خواستی مامۆستایاندایە”.
بەرهەم مستەفا ئەوەشی خستەڕوو، ژمارەی مامۆستایانی خۆپیشاندانەکەی سبەینێی بەغدا جێگەی خۆشحاڵی دەبێت، چونکە ڕێگەی بەغدا بۆ هەرێم چەند کاتژمێرێکە و ئاسان نییە تا هەموو مامۆستایان بتوانن ئامادەببن، بەڵام مامۆستایانی بەشداربوو لە بەغدا نوێنەرایەتی سەرجەم مامۆستایانی هەرێم دەکەن و خواست و داواکارییەکانیان دەگەیەنن، هاوکات گوزەران، دۆخ و ژیانی فەرمانبەران و هاووڵاتییانی هەرێمی کوردستان دەخەنەڕوو.
ناوبراو جەختی لە خەباتی مەدەنیانەی مامۆستایان کردەوە و ڕایگەیاند، “هەوڵەکانی مامۆستایانی ناڕازی ئەنجامی هەبووە لەسەر ئاستی ناوخۆیی و نێودەوڵەتی، ئەمەش بە مانای ئەوە دێت دەنگی مامۆستایان گەیشتووە، بەڵام خەباتی مەدەنی پێویستی بە ماندووبوون هەیە بۆ ئەوەی بگاتە ئەنجامێکی دڵخۆشکەر ئێمەش لەسەر داواکردنی ماف و داواکارییەکانمان بەردەوام دەبین”.
بەرهەم مستەفا لە کۆتایی قسەکانیدا داوایکرد لە پەرلەمانتارانی کورد لە بەغدا کە سبەینێ پشتیوانی خۆپیشاندانی مامۆستایان بکەن، هەروەها ئاسانکاریان بۆ بکەن لە ئەنجومەنی نوێنەرانی عێراق.
