بە هۆی کەمبوونەوەی ماوەی پێدانی کارەبای نیشتمانی، خۆپیشاندان لە پێنجوێن دەستپێدەکاتەوە و داواش دەکەن کارەباکەیان بخرێتە سەر ئێران.
ئەمڕۆ هەینی دەستەی ڕێکخەری خۆپیشاندانەکانی پێنجوێن لە ڕاگەیەندراوێکدا داوایان لە حکومەت کرد تا ڕۆژی چوارشەممەی داهاتوو کارەبای قەزاکەیان بکاتەوە بە 24 کاتژمێری و بە پێچەوانەشەوە خۆپیشاندان دەکەن.
دەستەکە ڕێگای ملەکەوەی وەك شوێنی ئەنجامدانی خۆپیشاندانەکە دەستنیشیان کردووە، کە شادەماری هاتووچۆی بازرگانی نێوان سلێمانی و کۆماری ئیسلامی ئێرانە.
جگە لە دابینکردنی کارەبای 24 کاتژمێری، لە ڕاگەیەندراوەکەدا داوای تەرخانکردنی بودجە بۆ نۆژەنکردنەوەی کارەبا و چالاککردنی لیژنەی بەدواداچوونی زێدەڕۆیی کراوە.
دەستەی ڕێکخەری خۆپیشاندانی پێنجوێن داواشی کرد جۆ چارەسەرکردنی یەکجاری کێشەی قەزاکە، کارەبای پێنجوێن بخرێتەوە سەر ئێران.
